Ha ka jingrakhe ia ka World Rabies Week 2025 ha ka phang pdeng kaba ong “Leh mynta: Phi, nga , ka imlang sahlang” la pynkut ia ka jingrakhe mynta ka sngi ha Wika Conference Hall, Khliehriat ba la pynlong da ka ophis District Medical & Health Officer (DM&HO), East Jaintia Hills District.
Ha kane ka prokram la ia shimbynta da u Addl. Deputy Commissioner East Jaintia S.R. Marak MCS, District Surveillance Officer Dr. L. Sungoh, Veterinary Officer Dr. M. Lamare, Principal Eastern Jaintia College Dr. P. Nongtdu, ki nongtrei jong ka tnad ka koit ka khiah, ki khynnah skul, ki nonghikai napoh ka district bad kiwei kiwei.
U Addl. DC, ha ka jingkren jong u, u la ai ka jingsngewnguh ia ka ophis DM&HO halor ka jinglah jong ka ban pynlong ia kum kane ka prokram ai jinghikai khnang ban tip ia ka jingma kaba mih na kaba shah dait ksew khamtam haba dait ki ksew lamwir (rabid) kumjuh wat ki ksew bym lamwir ruh kane ka jingpang (rabies) ka lah ban bit sha ki briew lada ym phah sumar ha ka por ba biang.
U Marak, u la ïathuh ba kat kum ka jinglap jong u, ba ka jingshahdait ksew ka wanrah ia ka jingshahktah ba neh slem ha ka met u briew bad kaba wanrah ruh ka jingma ba khraw ia ka jingim briew, kumta u ïai ban ha ka ban ai thikna ia ka tika lad jingiada (Anti-rabies Vacvination) sha baroh ki ksew bad pynshlur ruh ia ki khynnah skul ba wan sha kane ka prokram ha ka ban pynsaphriang ia kane ka jingai jinghikai sha ki paralok, kiba ha ïing ha sem, bad sha ki para marjan shaphang ka jingma jong ka Rabies bad ban ïashimbynta lang bad ka sorkar ha ka ban pynduh jait ia kane ka jingpang na ka imlang sahlang.
Na ka liang u Dr. Sungoh pat u ïai ban ba shisien ba u ne ka kiba ïoh ia kane ka jingpang, niar eh ba kin im, kumta ka lad jingiada ne tika ka dei tang kane kaba lah ban pynshngain ia ngi, u ong shuh shuh.
Ha shuwa jong kane ka prokram ka don ruh ka jingiaid rally ba la iashimbynta da ki khynnah skul kaba la sdang na ka ophis DM&HO lyngba u surok NH-6 bad wan phai pynkut biang ha ophis jong ka koit ka khiah.
Ha kane ka jingrakhe ba shilynter taiew la pynlong ruh ia ki jingïakop kynthup ia ka Debate, Drawing, Skit bad Marathon ba la iashim bynta da ki khynnah skul jong ka district.
Na ka liang jong ka ophis Animal Husbandry & Vet Officer ha ka jingiatrei lang bad ka Meghalaya Veterinary Service Association (MVSA). La bthah ruh ba ia ki ksew ba la dap lai (3) bnai shaneng dei ban ai tika noh.
Khadduh, la ban shuh shuh ia ka phang pdeng (theme) haba rakhe ia ka World Rabies Week da kaba ring line “One Line Approach” kaba mut u briew, u mrad, ka mariang sawdong sawkun bad ka jingkoit jingkhiah ki dei ban long iajan iwei ia iwei khnang ba lyngba kata yn lah ban teh lakam ia ka rabies na ka bynta ka jingbha jong uba bun balang.
