U Acting Syeim ka Hima Nobosohphoh u bah Pherdinan Syiemiong haba kren sha ki lad pathai khubor u la pynpaw ïa ka jingsngewkhia kaba khraw halor ka jingjia shah thang ka kali jong u ha ka step phyrngap jong ka 26 tarik u Nailur 2025 ha ki briew ki bym lah ban ithuh bad u la kyntu ruh ïa ki khun ki hajar ki bym hun ïa ka jingtreikam jong u ba kin wan sha khmat ban ïakren lada don kano kano ka jingbym sngwtynnad ia u hynrei ym dei ban pynjot ne leh dusmon ïa ki mar ki mata.
U la ïathuh ruh ba u khlem phohsniew ne don ka jingthrang ban shong ha ka shuki hima kum u syiem, hynrei namar ka jingshah suspen jong u syiem u ba rim, ka hima ka la bynshet ïa u ban shim ïa kane ka kam ha ryngkat ka jinghun lang ka kur Syiemiong.
U la ïathuh ba ha ki khyndai bnai ka jingtrei kam jong u kum u syiem, u la pyrshang katba lah la i bor ban pyntyllun ïa ki kam ka hima ha ryngkat ki dkhot bad ki Lyngdoh bad u la ïathuh ba kum u briew ba tlot bad u bym pat ju mad ïa ka kam synshar u sngew ban panmap na ki khun ki hajar namar um lah ban pynhun lut ïa baroh bad u la ong ruh ba lada don eiei pyrshah ïa u, u sngew ban kyrpad ba kin wan ban ïa kynduh markhmat ban iakren bad ba kin wan ruh ha ka Dorbar Hima ka ban sa long ha u bnai ban wan bad lada kim hun ne ibit ia u, u kloi ban hiar noh na shuki Syiem namar um kwah ba un long u mawjynthut iano iano, ong u Acting Syeim.
