Ka FKJGP Mawkynrew Circle ha ryngkat bad ki bor pyniaid shnong jong ka Mawkynrew mynta ka sngi ka 29 tarik Nailur 2025 ki la leit ban khang tala ia ka PHC Mawkynrew na ka daw ka jingbym don doctor ha katei ka PHC.
Haba kren sha ki lad pathai khubor na ka liang u Sordar Shnong u Bah N. Shylla u la pyntip ba ka Shnong ka la phah jingthoh sha ki bor ba dei khmih sha u MLA ka thaiñ bad kumjuh sha ka tnad ka koit ka khiah hynrei ka sorkar kam leh ei ei bad ka ong iai shah, hynrei hadien ka jingiai ap khmih lynti haduh kine ki sngi khlem ki doctor, kumta na ka liang ki bor shnong ki ai por shitaiew ban wanrah doctor ha kane ka PHC.
Na ka liang u President ka FKJGP Mawkynrew Circle u Bah Shalanstar Mynsong u la ong hadien ka jingioh ujor na ki paidbah halor ka jingbym don doctor, kumta ka seng bad ki bor pyniaid shnong ka kyntu ia ka sorkar khamtam ia u Minister ka tnad ka koit ka khiah ba dei ban pynbiang doctor ha kane ka thaiñ.
Ha kane kajuh ka sngi ki bor pyniaid shnong jong ka Mawkynrew ha ryngkat bad ka seng ki la leit ban jurip ia ka Vertinary hospital bad ki la lap ba kim don doctor wat ki dawai ruh kumta na ka liang ka Shnong bad ka Seng ka dawa na ki bor ba dei khmih ia ka tnad Vertinary ban pynbiang doctor bad kumjuh ia ki dawai hapoh shibnai khnang ba kan long ka jingmyntoi ia ki paidbah ka thaiñ.
