Ha ka jingkynmaw ia ka sngikha kaba shispah sanphew hynriew snem jong u M.K. Gandhi, u Kpa jong ka Ri India kum shi bynta ka jingkynmaw burom ia une u Kpa jong ka ri India bad kum ka jingkynmaw burom ruh ia u (L) Kyrmen Susngi uba long u MLA, uba la long teng u PWD Minister ka Jylla, ha ki lai term bad MDC ha ki ar term bad ka jingwanrah jong u ia ka Primary Health Centre ha shnong Nangbah bad kiwei de ki kam pynroi ri, hapoh ka jingialam jong u ma Grecentus Susngi MDC la pynlong hynne ka sngi (02/10/25) ia ka Kyrmen Susngi Marathon kaba la sdang naduh Sawmer (Ladsabah) ia ki shynrang bad na Mynkseh (Mookaswan) ia ki Kynthei sha Madan Biar (Bir) Nangbah.
Ha kane ka jingiamareh (Marathon) kumba sawspah (400) tam ki la iashim bynta naduh ki khynnah kiba 10 snem haduh 18, 19 snem haduh 40 snem bad kiba 41 snem haduh 70 snem. Ha kane ka sngi la pynlong ruh ia ka Voluntary Blood Donation Camp ha Nangbah Government Upper Primary School Nangbah, ha kaba ka kongsan ha kane ka sngi ka Dr. P. Shylla, District Medical & Health Officer West Jaintia Hills District bad u ma Awhai Andrew Shullai MDC kum u Symbud kongsan.
Ka Dr. P. Shylla haba kren ha kane ka sngi, ka pynpaw ia ka jingkmen ka ba khraw ban ia don lang bad ban ia sakhilang ia kane ka Kyrmen Susngi Marathon bad ka Blood Donation Camp bad ai khublei kyrpang ia u ma Grecentus Susngi MDC bad ia baroh kito kiba ia don ktilang ha kaba pynlong ia kane ka Kyrmen Susngi Marathon bad ka ong ba ka long kaba dei ba ngin kynmaw burom ia ki Nonglehbha jong ngi.
Haba kren sha ki nongiashim bynta ha ka jingiamareh (Marathon) ka ong ba ka jingmareh ka long kawei na ki jingkhilan met kaba ai ia ki nongiamareh ia ka jingkoit jingkhiah bad ka kyntu ba ha ki snem kiban dangwan la khmih lynti ba ki nongiashim bynta ha ka Marathon kin nangbun shuh shuh. Ka pynkut ia ka jingkren da kaba ai ka jingkyrkhu kyrdoh ym tang ia ki nongmareh marathon hynrei ia baroh ki paidbah kiba la iawan naduh Mihmyntdu, Sabah bad ki Nongshong shnong jong ka Nangbah Pyllun (Nangbah-Mihmyntdu bad Sabah ki shnong kiba hap hapoh ka 17 Nangbah MDC Constituency).
Kham ha shwa la ioh ia ka jihngkren pdiang sngewbha da u ma Tonroy Iongwai, Waheh Shnong ka Nangbah, na u ma Grecentus Susngi MDC 17 Nangbah-Mihmyntdu uba long ruh u Organizer ia kane ka Kyrmen Susngi Marathon, na ka Dr. I. Khyriam Senior Medical Incharge Jowai Civil Hospital Blood Centre Jowai, ma Felix Synnah Member ka Hawahoi Socio Development Society Mihmyntdu, Rev. Lumlang Khongthohrem bad na u ma Awhai Andrew Shullai MDC uba long ruh u Symbud kongsan.
Ia ki khusnam ha ka jingiamareh (Marathon) la sam sha ki nongjop ia kiba wan nyngkong ki ioh ia ka song peisa kaba Rs 3,000/- bad ka Trophy ia kiba wan ba ar Rs.2,000/- bad ka Trophy bad ia kiba wan balai Rs.1,000/- bad ka Trophy.
Ki Nongjop ha ka jingiamareh (Marathon) na ka liang ki kynthei kiba 10 snem haduh 18 snem, (1). Iska Kyndait Lumpyrtuh (2) Trust Shylla Sabah Muswang (3) Dapbiangki Lyngdoh Mihmyntdu, kiba 18 snem haduh 40 snem (1) Marwa Shylla Sabahmuswang (2) Happines Phawa (3) Dur Dhar Nangbah katba kiba 40 snem haduh 70 snem (1) Brilianty Susngi Nangbah (2) Nisa Lyngdoh Mihmyntdu bad (3) ka Bellda Rymbai Mihmyntdu.
Ki Nongjop ha ka jingiamareh (Marathon) na ka liang ki shynrang kiba 10 snem haduh 18 snem (1) Sienmiki Kyndait Sabah Muswang (2) Ron Shylla Sabahmuswang (3) Wanda-thrang Phawa. Kiba 18 snem haduh 50 snem (1) David Dkhar Sabah Muswang (2) Teiboklang Biam Sabah Muswang (3) Dasaman Kyndait. Katba kiba 50 snem haduh 70 snem (1) Yoowanki Lyngdoh Nangbah (2) Dred Shylla Sabah Muswang ( 3) ma Trei Hinge Nangbah. Katba ia ka Special Prize la iohrah da ka Mei-ieid Ribargret Susngi kaba la 75 snem ka rta kaba long kawei na ki Nongiamareh Marathon ha ka Kyrmen Susngi Marathon.
La pynkut ia kane ka sngi da ka Voluntary Blood Donation kaba la pynlong ha Nangbah Government Upper Primary School ha kaba da ki phewngut ki Rangbah bad ki longkmie ki la wan ai kylluid mynsiem iala ka snam sha ka Health Department na ka bynta ka jingdonkam snam jong kiwei pat.
