(Da u M.M.Thaiang)
U Rev. Phadar Hilarius Lamare, Phadar Rangbah ka Shnat niam Jowai, Diocese Jowai, u la khlad hynne ka sngi (05/10/2025) ha ka por kumba 7.50 AM ha Nazareth Hospital Shillong. Ia ka met ba dangsah jong u la rah sha Jowai bad pynthiah ia ka hapoh ka Iingmane St. Theresa U Khunlung Jisu Cathedral Jowai. Ka jingleit on tep kan long ha ka 7 tarik mynta u bnai ha Lum Jyngtep ka Balang Katholik Jowai. Ka jinglehniam kan long naduh ka por 10.00 AM bad ia ka jinglehniam yn pyndep da u Most Rev. Ferdinand Dkhar DD, Bishop ka Jowai Diocese.
Ban iatip lang katto katne shaphang u (Late) Rev. Phadar Hilarius Lamare. Ia u Rev. Phadar Hilarius Lamarela kha ia u ha ka 14 tarik April 1949, ha shnong Nongkynrih, Elaka u Doloi Raliang. U dei u khun uba ar jong ka (L) Aloysi Lamare bad u (L) Lan Dkhar. U la wan na ka iing ka sem kaba tipbriew tipblei bad kaba ieng rasong skhem bha triang ha ka Niam kaba ai U Blei ha ki longshwa manshwa, ka niam kaba ap jingong bad kaba peit na ki dak ki shin jong u jingkñia bad na ki dak ki shin jong u Klong u Skaw ha ka suit ha ka shor.
U Kpa, ka Kmie bad kiba ha ïing hasem ki long kiba riewblei ha ka Niam u Longshwa manshwa, hynrei ha ka jingiohi bad ka jingshem jinglap jong ki katba nangiaid ka por ka niam kaba ki ngeit ka la nangkuluh bad synjor. Ban shem ia ka Niam kaba iasariem bad ka Niam kaba ai u Blei ha ki longshwa manshwa ka niam kaba don ka jer, ka thoh (Pyrtuid Boo), ka pyneh rngiew (pyneh rangu pyneh pshi), ka iabam, ka ia sib ia u Kpu, u Rynsi, kaba don ka Knia ka Khriam (Mass bakhuid), ka Duwan ka Dupat, ki Langdoh, ki Riblai ym don laitnoh na ka Niam Katholik. Hadien ka jingpyrshang jong ki kaba katto katne bnai, kiba ha ïing hasem jong u Hilarius (Rev.Phadar Hilarius) ki la raikut ban iehnoh ia ka Niam U Barim bad pynthymmai ialade ha ka Niam Katholik. Ki la iohpdiang ia ka Babtisma ha ka 14 tarik u April (Iaiong)1963, sngi saitjain peitmiet Paskha da u (L) Rev. Phadar Elias Tome SDB, u Apostol ka Ripnar ha Iingmane ka Maria kaba la pun khlem pop tynrai (Maria Imaculate) ha Mawkyndeng (Mookyndeng)
U Hilarius Lamare, hadien ba u la pass ia ka Class V na DSt. Dominic M.E. School Mawkyndeng, u la leit beit beit sha St, Paul Seminary Upper Shillong bad u la pyndep ia ka jingpule naduh Class VI haduh Class XII. Ia ka jingpule Philosophy bad BA na Christ King bad St. Anthony College Shillong. Ia ka Theology na Orient Theological College bad Sacred Theological College Mawlai, Shillong.
La pynkyntang Deacon (Langdoh sohsla) ia u (Hilarius Lamare) ha ka snem 1982 da u Bishop Most Rev.Geoge Malassary DD jong ka Tura Diocese bad pynkyntang Langdoh Niam (Priest) ha ka 16 tarik January 1983 da u Archbishop ka Archdiocese Shillong, Most. Rev. Hubert D’ Rossario.dd, ha Madan Pamsna Laskeiñ, Elaka u Doloi Raliang.
Hadien ka jingpynkyntang Langdoh (Lyngdohniam) la phah ia u ban leit trei ha ka Parish Umsohlait (Ribhoi) kumba hynriew bnai eiei nangta la phah ia u sha Parish Mawkyrwat ha ka snem 1983. U Councellor ka St. Paul Seminary Upper Shillong ha ka snem 1986 haduh ka snem 1990. Nangta la phah ia u sha Parish Namdong, West Jaintia Hills naduh ka snem 1990 haduh u snem 1996. U la sah ha Mawkhar Parish katto katne por bad pyndep ia ka jingpule M.Ed. Nangta naduh ba sdang ka snem 1997 haduh ka snem 2005 ha Parish Iingmanebah (Cathedral) Laitumkhrah Shillong. U Vicar General, ka Archdiocese Shillong naduh ka snem 2005 haduh ka snem 2011 bad sah ha Archbishop’s House Laitumkhrah Shillong.
Ha ka jingkhlad syndet-syndet (kyndit) u Bishop ka Jowai Diocese Rt. Rev. Vincent Kympat DD, u Bishop uba nyngkong eh ka Jowai Diocese, la phah ia u Rev. Phadar Hilarius Lamare ban wan shimti ia ka Jowai Diocese kum u Diocesan Administrator ban pyniaid shipor katba ym pat thung Bishop ia ka Jowai Diocese. U la wan shimti kum u Diocesan Admnistrator ha ka 10 tarik August 2011 bad neh ha ka kam haduh u April (Iaiong) 2014. Haba la wan shimti u Archbishop ba la shongthait (Emaritus) Guahati Archdiocese, Most. Rev. Thomas Menamparampil SDB-DD kum u Apostolic Administrator ka Jowai Diocese, ia u Rev. Phadar Hilarius Lamare pat la thung ia u, u Parish Priest jong ka Shnat niam Jowai (Parish Priest ka Parish Jowai) bad u la shimti ia ka kam ha ka 24 tarik January 2015 bad ha ka juh ka por u bat ia ka kam Vicar General ka Jowai Diocese. U long u Parish Priest ka Parish Jowai naduh ka 24 tarik January 2015 bad bat ia ka kam haduh ka sngi ba u la khlad (05/10/2025) ha Nazareth Hospital Shillong.
U Rev. Phadar Hilarius Lamare u long ruh u Freeland Journalist U la long arsien arwat u Editor ka ïingKhristan (ka Kot Khubor Niam Katholik) kaba mih shisien shibnai na Shillong ha ka juh ka por u long ruh u Akhia, u Nongthoh kot bad u Nongthoh Articles.
Kum u Nongthoh kot u la pynmih shibun ki kot kum ka (1) Tei ia ka longiing longsem halor u Mawsiang (2) Pynkhreh ban pdiang ia ka Sakrament jingpynskhem (3) U snem ki paidriewngeit Katholik (4) Ki Samla ka lawei baphyrnai ki Iing ki sem, ki Balang ha ka imlang sahlang (5) Ka jingkhot ban long Khristan (6) Ki Nongtreilang ha ka Brisoh Wain U Trai (7) Ki Sakrament kit long jong ka jingim ki Nongbud U Khrist (8) Ka Riti mane Blei (9) Ka Lyngkha baiar (10) Sharai iala ki ‘Langbrot (11) Kaei ka Maria Theisotti? (12) Hato phi dang ngeit? (13) U thlen ha ka imlang ka sahlang bad kiwei de ki kot kiba u la pynmih na ka por sha ka por.
U Rev. Phadar Hilarius Lamare, u briew uba iar ka jingmut jingpyrkhat, uba iohi jngai la ha ka kam met ne ka kam mynsiem, uba iaishah ia ka jingkren beiñ bad u bym dawa jingiaroh bad u long ruh u Spiritual Director jong ka St. Vincent De Paul, Jowai Area Council diocese Jowai bad hapoh ka jingai mynsiem jong u, ka Society St.Vincent De Paul ka la iaid shaphrang ha kaba shna ia ki ïing baduk, Alternative Health Centres bad kiwei de ki kam babha iala ki parabriew ia kiba ka Society kam shym la pynbna ne put turoi.
Nangta ha ka por ba u long u Diocesan Administrator la tei ia ka Joseph Nardini Seminary ha Ummulong, hapoh ka jingpeit jingkhmih u Sohblei Ferdinand Dkhar Procurator ka Jowai Diocese (mynta u long u Bishop ka Jowai Diocese) bad mynta la ioh ia ka Seminary kaba heh kaba itynnat kaba long ruh ka Shlem saindur na ka bynta ki khun Samla jong ka Balang ban pyrshang ban poi sha ka jinglonglyngdoh sohblei hapoh ka Balang.
U (L) Rev. Phadar Hilarius Lamare, u long uwei na ki Nongshna ia ka Iing U Blei ha kane ka pyrthei bad kane ka paw na ka jingshimkhia jong u ban tei ia ka Iingmane bah (Cathedral jong ka Diocese) kaba ieng mynta halor lum kaba mar pyrshah ia ka iingskul Marianhill Higher Secondary, hynrei pat um shym la lah ban iohi ba kan dep naba U Blei Uba shna iing ia u ha bneng u la dep shna bad la khot ia u ban wan shong wan sah ha kata ka iing kaba U Blei u la dep shna ia u bad u Rev. Phadar Hilarius Lamare um donpor shuh ban pyndep shna ia ka Cathedral kaba dei ka iing U Blei, u la shah khot ha U Blei ban wan shong noh bad hadien ba u la pynkhreh naduh ka 18 tarik u August 2025 bad u la mihnoh na kane ka pyrthei ha kane ka 5 tarik October 2025 ha ka por 7:50 AM na Nazareth Hospital Shillong.
U Phadar Hilarius Lamare u la long u Lyngdohsohblei mynta la sawphew ar snem bad ha kine ki sawphew-ar snem, u la khot ia u Jisu man ka sngi ban hiar halor ka Duwan bad u Jisu um ju pep ban hiar kum U Blei ha ka dur jong u Kpu haba khot u phadar Hilarius bad ha ka jingpyrkhat briew u Phadar Hilarius bad U Jisu ki ialong paralok bha bad kum u paralok U Jisu un khot sngewbha ia u Phadar Hilarius sha ka iing kaba u Jisu u la dep pynkhreh na ka bynta jong u (Hilarius).
