Ka Loompyrdi Iongpiah Dorbar Shnong Jowai ha kane ka 5 tarik u Risaw kala pynlong ïaka jingïakynduh lang ba kyrpang ha Yungwalieh jong ka shnong, ha kaba ki khun ka shnong naduh ki khun samla, ki riew rangbah bad ki longkmie kila wanban ïashim bynta lang.
Ïa ka jingïalang la pynïaid da u samla Kwelly Challam bad ka samla Iwakani Challam, na ka liang u ma Pynsakhiat Ieini Kyndiah, Kñi ka Loompyrdi Iongpiah ula ai ka jingnguhblai, u ma R.L. Bimee Suwer, Waheh Shnong ka Loompyrdi Iongpiah ula ai ki kyntien lamphrang halor ka thong jong kane ka sngi kaba ong “Kob Yei Nam”, ka jingkren naka longkmie P. Shullai, na ka samla Synchar Pyrbot kiba la shah pynkup burom ha kane ka sngi bad kumjuh na u ma Marbun Laloo uwei na ki nongthoh Drama ka Loompyrdi Iongpiah.
U ma R.L. Bimee Suwer haka jingkren ula ong ka jingthmu ban pynlong ïa kane ka jingïakynduh lang ka long ban wanrah ïa ka jingïajuh ïajan bad ka jingïaieit hapdeng ki khun jong ka shnong bad ka nongrim ban tur shaphrang ban wanrah ka bha ka miat jong ka lawei.
Ha kane ka sngi la pynkup burom ïa ki 16 ngut ki longkmie bad ki longkpa kiba la kynjoh sha ka rta kaba 70 snem, 4 ngut ki nongthoh drama haka por Bamphalar, 14 ngut ki khun samla kiba la ïoh 60% shaneng haka SSLC Examination, 13 ngut haka HSSLC Examination, 6 ngut kiba la pyndep ïa ka Graduate bad 7 ngut kiba pyndep ïa ka Post Graduate.
U ma Pearlet Toi uwei na ki riewrangbah ka shnong Loompyrdi Iongpiah haka jingkren ula pynkynmaw ïa ka jinglong ka ïingdorbar (Yungwalieh) jong ka shnong kaba la kylla dur nadong shadong haba phai sha ki por mynshwa, da kaba ong kane ka pyni ba ka Dorbar Shnong kala ïaid shakhmat katkum ka jingïaid ka por. Haka juh ka por ula ai mynsiem bad kitbok ïa ki khun ka shnong kiba la shah pynkup burom ha kane ka sngi.
Ka Dorbar Chnong Loompyrdi Iongpiah kala pynkup burom kumjuh ïa ka Dr. Wakani Toi ka khun jong ka kong Best Toi bad u ma Arun Lanong, kaba dei kawei na ki khun ka shnong kaba la pyndep ïa ka kyrdan pule MBBS, ha kane ka sngi la leh burom ïa u Waheh K.F.Laloo da kaba aiti ïa ka Muhor Sahnam sha kiba haïing hasem jong u.
La pynphuh pynphieng shuh shuh ïa kane ka sngi da ki jingrwai, ki jingshad bala shim bynta da ki khun samla, ki longkmie bad ki khynnah skul ka Loompyrdi Iongpiah, katba ïa ki kyntien ai khublei la ïoh na u ma Wansalan E Dhar, General Secretary ka Loompyrdi Iongpiah.
