Shi bynta na ka jingrakhe ia ka Wildlife Week-2025, ka Wildlife Wing jong ka Forest and Environment Department kala pynlong ia ka jingiamareh kaba la tip kum ka “Run for Wildlife” kaba lai ha nongbah Shillong ha kane ka 4 tarik mynta u bnai.
Ha kane ka jingiamareh la wan ban iashim bynta haduh 600 ngut ha ki rta bapher bapher naduh ki khynnah kiba 10-18 snem, ki samla naduh 19-40 snem, ki rangbah 41-55 snem bad kiba la heh rta 56 snem shaneng, ba kynthup naduh ki khynnah skul, ki nongtrei jong ka tnad Forest kynthei bad shynrang.
Ia kane ka jingiamareh la kaweh lama da u Harish Chandra Chaudhary uba dei u Principal Chief Conservator of Forests & Chief Wildlife Warden, ha ka jingdon ryngkat u P.K. Agrahari, Chief Conservator of Forest bad kiwei de ki ophisar ka tnad. Ka jingmareh kala sdang na Forest Management Building kaba don ha Lower Lachumiere. Ka jingmareh ka long na ka bynta ka 5 km, ka 7 km bad ka 10 km kaba pynkut ha ka juh ka jaka ba la sdang.
Ka jingthmu ba kongsan jong kane ka jingiamareh ka long ban pynsngewthuh ia ki paidbah shaphang ka jingriewspah jong ka jylla ha ka jingdon jong ki syntiew ki skut, ki dieng ki siej bad ki mrad ki mreng hapoh ka jylla bad kumno ban pynneh pynsah ia ki. Kumjuh ban tip kumno ban iada bad tyngkai ia ka mei mariang.
