Ka Meghalaya SSA Schools Association (MSSASA) mynta ka sngi ka 6 tarik Risaw 2025 ka la rai ban leit ai da ka jingthoh ban bishar bniah (Review Petition) ha ka Supreme Court pyrshah ïa ka hukum kaba ong ba ki nonghikai SSA kin hap ban pass ïa ka Teacher Eligibility Test (TET) lada ki kwah ban bteng ïa ka kam hikai jong ki.
Ha kane ka sngi la don ryngkat lem ki nongialam ba kynthup ia u President ka MSSASA u Bah Aristotle C Rymbai, Babu B.Nonglait General Secretary, Babu W Kharkongor ha ryngkat bad ki nonghikai SSA.
Haba kren ha kane ka sngi na ka liang u President ka MSSASA u Bah Aristotle Rymbai u la ong ka seng kam lah ban pdiang ïa kane ka hukum namar ka wanrah jingeh ïa kiba bun ki nonghikai kiba la trei palat ïa shiphew snem ne palat sawphew snem.
“Ngim pyrshah ïa ka TET, hynrei ngi kyrpad ïa ka sorkar bad ïa ka Supreme Court ba kin shim jingmut jingpyrkhat halor ka jinglong jingman jong kito ki nonghikai kiba la trei da ka jingshaniah bad jingkitkhlieh la slem,” la ong u Babu Aristotle Rymbai.
Ka MSSASA ka la rai ruh ban thoh sha ka tnad Pule bad sha ka Sorkar Jylla ban kyrpad ba kin ai por bad ai jingkyrshan ïa ki nonghikai kiba la trei shitom la bun snem.
Nalor kata u la pyntip ruh ba ka seng ka la thaw da ka kynhun ai jingmut ha ka liang aiñ (legal committee) ban pynkhreh ïa ka Review Petition, kaba yn leit ai hapoh ar taïew ban sa wan.
Ha kane ka jingïalang ha Madan Malki la wan shim bynta da ki nonghikai na kylleng ki jaka ki ba na shajan bad na sha jngai kaba la don da ki spah ngut, kane ka pynpaw ïa ka jingïatylli bad ka jingshimkhia ban pynneh pynsah ïa ka bha ka miat jong ki nonghikai SSA ha Meghalaya.
