Ha ka 8 tarik u bnai Risaw 2025 ka MDC jong ka Narpuh Constituency ka Kong Deiwi Tongper ha ryngkat bad ki trai jaka brikwai kiba don ha khappud Indo-Bangladesh kum ka Umkiang, Lumphyllut, Dona Bhoi ki lah ïoh ban leit ïakynduh ïa u DC ka East Jaiñtia Hills District ryngkat ka jingthoh na ka bynta ban kyntu jur ba un kyntu ïa ki BSF na ka bynta ban pynjur ka jingpahara ha ki khappud khnang ba ki nong Bangladesh kin ym ïoh rung tuh bad ban tuh ïa ki kwai khamtam mynta ba lah jan dei ka aïom ban kheit ïa u soh kwai.
Kum ban shu pynkynmaw ba ka la don ka jingshah tuh kaba jur ki kwai jong ki Khasi kiba don jaka ha khappud Indo-Bangladesh kaba hap hapoh ka Narpuh Constituency, ha kaba ki nong Bangladesh ki tuh bad kheit ïa ki kwai wat haka por mynsngi mynshai ruh khlem don jingtieng jingsmiej iano ruh bad bunsien wat lada don ki trai jaka ruh kim ju kheiñ ïa ki namar ki ïa don shibun ngut bad ki shait rah bad ki tiar pynmynsaw.
Kumta ka kynhun jong ki trai jaka ki la dep ïakynduh ïa ki Area Commander jong ki BOP kiba don ha kine ki jaka, ryngkat ka jingkyntu ïa u DC ba un peit lem ïa kane ka jingeh ba ki nongshong shnong ha khappud ki ïakynduh.
Ka MDC ka ong ïa kane yn ai jingtip ruh sha u MP ka Lok Sabha u Dr Ricky AJ Syngkon ban tukla lem ia kane ka jingeh jong ki nongshong shnong khappud bad ka Bangladesh.
