Mynta ka sngi katto katne ngut ki rangbah jong ka thaiñ Hingaria bad Huroi, ki shnong kiba don sha ki bynta khappud bad ka Bangladesh bad kiba hap hapoh ka jingpeit jingkhmih jong u Doloi ka Elaka Rymbai, kila leit mih sha ka ophis JHADC ban dawa ne pan jingshai halor ka jingbym trei jong ka ophis ban Register ia ki jaka puta jong ki nongshong shnong katei ka thaiñ.
Na ka liang jong kane ka kynhun kaba kynthup ia u ma Marshall S.B. Biam, u ma Thepmon Khonglah, u ma Ephesos Talang bad u ma Poly Pohlong kila leit ban buh da ka jingthoh ha u CEM ka JHADC u ma Thombor Shiwat ban pan jingshai ba balei ka ophis ka kyntait ban pdiang ia ki aplikeshon form bala pyndap da ki nongshong shnong na ka bynta ban ioh ia ki Land Holding Certificate.
Katkum ka jingthoh ba la phah la kdew ba ka ophis (JHADC) kam shym la pdiang ia ki aplikeshon ba la dep ban pyndap da ki nongshong shnong ban ioh ia ka Land Holding Certificate. La kdew ba ka ophis ka dawa ba ki dei ban ioh ia ka jingmonjur jong u Doloi ka Elaka Rymbai. La pynpaw ba kumba long mynta ka Elaka Rymbai kam don ia u Doloi namar ba ka ïing bishar Meghalaya High Court kam pat shah ban thung Doloi namar ba ka case ka dang sah hapoh ka jingbishar.
Ka jingthoh na kitei ki rangbah ka pynpaw ba kumba long mynta haba ym pat ioh ia u Doloi hapoh katei ka Elaka, ia ka kam la aiti shipor ha ka A.O jong ka District Council ban peit, hynrei na ka liang jong ki bor pyniaid ophis kim trei satia ban shim ia kitei ki aplikeshon form jong ki nongshong shnong, kumta ki dawa ban ioh ka jingshai na ka Council.
Kumta ki nongshong shnong ki buh ka jingkylli balei ba Council ka phah ia ki nongshong shnong ban leit phah soi ia ki aplikeshon jong ki, namar la sngewthuh ba ka Elaka kam lah ban ai kano kano ka jingmonjur ne ka recommendation lait tang u Doloi. Namar kata ki la buh ka jingkyntu ia u CEM bad ia u EM ba dei peit ia ka Elaka Rymbai ban ai ka jingshai kaba pura ia ki nongshong shnong, khnang ba kin lah ban ioh ban pynskem pura ia la ki jong ki jaka puta jong ki bad ruh ban iaid beit iaid ryntih ka roi ka par ha ki shnong ki thaw.
