Hadien ka jingialang jong ka “Dream Mission” hapoh ka Jingialam jong u Myntri Rangbah Conrad K. Sangma ryngkat ka Tnad ka Koit ka Khiah, Tnad Social Welfare bad ka Tnad Pulit, ki Dorbar Shnong, ki Nongialam Niam bad kiwei kiwei na ka bynta ka jingiakhun ban rat dyngkhong ia u Drok ha ka Jylla, u Myntri Rangbah u la pyntikna ba ka Sorkar ka la pynkhreh na ka bynta ban buh ia ki jaka sumar ia kiba la kyrni bad shah teh ha utei u jingdih pynbuiad ha baroh ki Distrik bad katei ka thong kan treikam noh ha kine ki khyndiat bnai.
U Sangma u la iathuh ba yn wanrah bad pynlong ka jinghikai ba paka na ka bynta ki Doctor bad ki Nongiarap ha kaba iadei bad kitei ki jaka sumar.
Ha kaba iadei bad ka jingiakhun ban pynduh jait ia u Drok, u Conrad u la iathuh ba la bthah ia ka Tnad Pulit ban pynlong ia ka jingkhynra ha baroh ki jaka ba la ju ioh jingtip ba don kiba dih bad die drok bad katei ka jingkhynra kan long ha ka por kaba yn ym don ba khmih lynti. Nalor kata ban kham iarap shuh shuh ia ka Tnad Pulit, yn buh ruh da ka CCTV ha bun tylli ki jaka, khamtam ha kito ki jaka ba kongsan ia kiba la ju ioh jingtip ba don ki nongdie.
“Nga kwah ban ai ka khubor kaba shai ba ka Sorkar ka shimkhia halor kane ka mat bad phin sa iohi ia ka jingtrei kaba radbah ha kine ki snem ban wan bad kumba nga la ong ba ka Tnad Pulit, Tnad Social Welfare, Tnad jong ka Koit ka khiah bad ki Dorbar Shnong kin iatreilang na ka bynta ban pyntikna ba ka jingiakhun ia u Drok kan lah ban iohi ia ka jinghiar” iathuh u Myntri Rangbah.
U Myntri Rangbah u la kdew shai ba kawei na ki daw ba shah ngop ki samla ha utei u jingdih ka dei na ka jingdon ki nongdie bad ka Sorkar ka la ai jingmut ia ki Bor Pulit ban shim khia halor kane da kaba leit ban wad sha baroh ki jaka kyndong kynshrot na ka bynta ban pynduh jait ia katei ka jingsniew.
