U District Magistrate ka West Jaiñtia Hills District u Abhinav Kumar Singh (IAS) mynta ka sngi Palei ula pynjari syndon da Curfew miet hapoh ka kyndon Section 163 BNSS ka ban treikam naduh ka 6 baje janmiet haduh ka por 10 baje mynmiet ha baroh ki bynta khappud jong ka District hapdeng ka Assam bad Meghalaya.
La pynjari ïa kane ka hukum shi bynta ban wanrah ïa ka jingshongsuk shongshngaiñ ban tehlakam ïaka jingïakynad jong ki ar jaitbynriew (Karbi-Pnar) kiba don ha khappud.
U DM ula khang pyrshah ïa kino kino ki briew ban ïaid ha ki bynta khappud kiba dang hap hapoh ka District, la khang ruh ban ïalum paidbah da ki kynhun palat ïaka 5 ngut, la mana ruh ban rah ïa ki tiar pynmynsaw ha kitei ki bynta khappud.
Kane ka hukum kan treikam mardor naduh mynta ka 9 tarik tad haduh ban da pynbna da kumwei pat.
