Ka Khun Hynniewtep National Awakening Movement (KHNAM) ha ka 10 tarik Risaw 2025 ka la wan iakynduh ia u CEM ka KHADC halor ka jingshah ktah kti u Rangbah Shnong jong ka 15 mer Ri Bhoi District.
Haba kren sha ki lad pathai khubor na ka liang Working President ka KHNAM u Bah Thomas Passah u la ong ka KHNAM ka pynpaw ia ka jingsngew khia kaba jur halor ka jingshah shoh u Rangbah Shnong ka 15 mer ba hap ha Ri Bhoi District bad ka KHNAM ka la pynsngew ha u CEM lyngba ka shithi bad pynpaw naduh mynshwa ki bun bha ki Jaitbynriew na ka Community Garo kiba soi kum u Rangbah Shnong, ki thoh shithi sha u BDO, sha u CEM ki ai NOC kum u Rangbah Shnong khlem da ioh bor na ka Hima Mylliem bad khlem ka jingpynkup da ka Aiñ.
Na ka liang ka KHNAM ka la pynsngew ha u CEM ka KHADC u Bah Winston Tony Lyngdoh lada phai sha ka aiñ jong ka Hima Mylliem 2007 ka kren shai ba uba lah ban long Rangbah Shnong u dei beit u Khasi bad ka KHNAM ka la ai da ka jingthoh sha ka District Council khnang ba kan pynshitom ia kine ki briew kiba pyndonkam bakla ia ka bor jong ka Hima Mylliem ia ka itiar jong ka District Council.
Nalor kata ka KHNAM ka la ai jingmut sha u CEM ban ai da ka jingthoh sha u DC jong ka Ri bhoi bad sha ki BDO ba kim dei ban pdiang ia ki shithi kiba lah soi da kiwei ki jaitbynriew lait noh ki Khasi kum ki Rangbah Shnong.
Na ka liang ka KHNAM ka kyrmen ba ka District Council kan pyndep ia ka kamram bad ia ka bynta kaba donkam khnang ban pynduh jait ia kum kine.
Ka KHNAM ka la ioh ruh ban pynsngew bad ai jingmut sha u CEM ba ha ki shnong ki bym don shuh ki Khasi ka District Council ka la dei ban thung noh da u Myntri ban pyniaid ia ki kot ki sla bad kum u Rangbah Shnong dei ban soi beit da u briew na ka jaitbynriew Khasi.
