U President ka Muaythai Association of Meghalaya u Bah Angelus Sunn ryngkat bad ka kynhun ha ka 10 tarik Risaw 2025 ki la wan ban pyntip paidbah ha Shillong Press Club ha kaba ia dei bad ka jingshah jied arngut ki khynnah ialehkai ka jylla ba kynthup ia ka Alphonsa Zinia 16 snem ka rta bad u Andy Taro 17 snem ki ban leit mih khmat sha ka “3 Asian Olympic Youth Games” ha Bahraiñ naduh ka 22 tarik mynta u bnai bad kan kut ha ka 30 tarik Risaw 2025.
Haba iakren bad ki lad pathai khubor u Bah Angelus u la pynsngew ba arngut ki nongïalehkai na ka jylla kin leit iashim bynta ha ka 3rd Asian Game kaba long ha Bahraiñ naduh ka 22 tarik haduh ka 30 tarik mynta u bnai. Kine ki arngut ki la shah jied ban mihkhmat na ka ri India ha kane ka lympung ialehkai ba heh tam jong ka dewbah Asia.
Ki nongïalehkai bad ki official ki pynpaw ka jingsngewkmen bad ka jingsngew sarong ba ka jylla Meghalaya ka la don bynta ha kane ka kynhun bad ia baroh ki jinglut jingsep la ai da ka sorkar bad da ki nongkyrshan jong ki, ban pynthikna ba kine ki arngut kin lah ban iashim bynta khlem kano kano ka jingeh.
U Andy Taro ba dang 17 snem ba dei na ka thain Ribhoi u dei u nongïalehkai u ba la pynpaw nam ruh, ha kaba u la leit iashim bynta ha ka World Cup ha United Arab Emirates ha u snem 2022, ha kaba ki nongïalehkai na Meghalaya ki la wanrah haduh 5 tylli ki medal kum ka jingjop kaba pynkmen ïa ka jylla bad ka ri.
Ka Sorkar Meghalaya ruh ka la ai jingïarap lyngba ki scholarship sha ki nongïalehkai ba wanrah ïa ki medal kata, ka pisa jingïarap T.8,000 na bynta ki nongjop gold medal, T.7,000 na bynta silver, bad T.6,000 na bynta ka bronze. Kane ka jingïarap na ka sorkar ka iarap ban pynkhreh shimet ïa ki nongïalehkai ban nanglah ban wanrah nam wanrah burom ia ka jylla .
U Bah Angelus u la ong ruh ba ka kynhun mynta ka la sdang ïa ka jingpynkhreh na bynta ka 39th National Games ka ban sa long ha Meghalaya ha u snem 2027, ki tnad ialehkai bapher bapher ki la pynkhreh na bynta kane ka jingïalehkai bad ki khmih lynti ba ki nongïalehkai ka jylla kin ioh ban ïalehkai ha ka kyrdan ba kham shalor khnang ban wanrah nam bad burom ïa ka jylla Meghalaya.
