Ka Synjuk Waheh Shnong East Jaintia Hills District (SWSEJHD), ha ka 11 tarik mynta u bnai kala leit ban ai Memorandum sha u Deputy Chief Minister ka Jylla u ma Sniawbhalang Dhar na ka bynta ban pynioh ia shibun ki lad jingiarap hapoh ka thaiñ East Jaintia, khnang ban pynsuk ia ki nongshong shnong ka thaiñ.
Na ka liang ka Synjuk kala dawa ban pynbha ne maramot ia ki Surok kiba don hapoh ka Wapung C&RD Block, East Jaintia Hills District, kiba la don mynta hapdeng ka jingsniew kaba sha palat pud. Ka jingsniew jong kine ki surok kala wanrah ka jingeh kaba khraw ha ka leit ka wan jong ki briew bad ki kali motor.
Katkum ka jingthoh ba la phah sha u Dy. CM la kdew ba ki don haduh 4 tylli ki surok kiba la sniew jur kiba don hapoh jong kane ka Block. Kine ki surok ki kynthup ia ka Wapung Shnong Lad Sohkymphor sha Wapung C&RD Block, ka Mukhep lyngba ka Pamrapaithlu shaduh Wapung C&RD Block, ka Wapung Skur sha Wapung C&RD Block bad ka Pamrampaithlu sha Wapung C&RD Block.
Ha ka jingiadei bad ka Lad Rymbai Police Outpost na ka liang ka Synjuk kala dawa na u Dy.CM ban iarap kyntiew kyrdan noh ia kane ka Outpost sha ka Police Station (PS) ba pura. La pynpaw ba kane ka Outpost kumba long mynta ka don shibun ki jingduna, naduh ka jingduna jong ki Pulit bad nongtrei ba dei ban don bad kane ka ktah shibun ia ka shongsuk shongshngaiñ jong ka thaiñ.
Ka Synjuk ka kyrmen ba lada lah ban kyntiew kyrdan ia katei ka Outpost sha ka PS kan sa iarap shibun ia ki bor jong ka aiñ ba kin lah ban teh lakam ia kino kino ki kam sniew bad kam thombor hapoh ka thaiñ bad ha ka District hi baroh kawei.
Ha ka jingiadei bad ka jingkiew palat ka Bill lait hapoh ka District, kaba la wan rah ka jingeh ba khraw ia ki nongshong shnong ka District, ka Synjuk kala dawa na u Dy. CM ban phah pynlong da ka jingtohkit kaba shai halor ka rukom shna ia ki Bill lait.
Ka Synjuk ka pynpaw ba kumba long mynta ka jingpynpoi ia ki Bill lait hapoh ka District ka long ka bym shai namar ka jingpoi jong ka Bill kaba heh kam iahap shuh bad ka jingpyndonkam ia ka bording ki nongshong shnong.
Kumta ka Synjuk la kyntu jur ia u ma Sniawbhalang Dhar ba un peit un khmih lem halor kane ka jingeh kaba ki nongshong shnong ka District ki iakynduh bad ban iarap kloi ban pynioh ia kine ki jingdawa ba kongsan jong ki nongshong shnong.
