Ka All Meghalaya Alive & Fresh Fish Supplier Association (AMAFFSA) ha ka 12 tarik Risaw 2025 ka la plie pyrda ia ka jingdie dohkha im ha Muncipal Parking Lot pyrshah Anjalee Cinema Hall.
Ha kane ka sngi u MLA ka Mawkyrwat u Bah Renikton Lyngdoh Tongkhar, u la long u kongsan ha ka jingiadon ryngkat lang u CEO ka Shillong Municipal U PK Boro, MCS, kum u Symbud Kongsan, u Bah Dundee Cliff Khongsit ha ryngkat ki nongkitkam ka All Meghalaya Alive & Fresh Fish Supplier Association.
Ha kane ka sngi la ioh jingkren na u Kongsan u Bah Renikton Lyngdoh Tongkhar, na u Symbud Kongsan PK Boro, u Bah Dundee Khongsit bad kumjuh na ka Secretary Kong Rina Kharbudnah.
Na ka liang u kongsan u Bah Renikton Lyngdoh Tongkhar u la ai khublei kitbok kitwriang ia kane ka kynhun All Meghalaya Alive & Fresh Fish Water Supplier Association bad u kyrmen ba lyngba ka jingplie lad kane ka kynhun kan long kaba jop.
Nalor kata u la bynrap ba ka jingpynmih dohkha ha ka jylla ka la poi sha ka 20,000 hajar metric ton bad sa kumba 12,000 hajar metric ton ka dang duna ha ka jingpynmih ia ka dohkha bad lyngba kane ka jingplie ia ka jingdie ia ki dohkha im kan long ruh ka jingplie lad bad u kwah ba kiba die ia kine ki dohkha im kin riewspah bad kin longbriew manbriew ha ka ioh ka kot.
Na ka liang U Symbud Kongsan u PK Boro u la ai jingiaroh ia kane ka kynhun bad u pynpaw ba ka long ka sienjam kaba biang bha ba kane ka kynhun ka la shim ban die ia ki dohkha im sha ki paidbah kiba ri dohkha ha kane ka jylla bad u la ong bad lyngba nangne kane ka kynhun kan sa lah ruh ban buh ia ki iew die dohkha im sha Jowai, Ri Bhoi, Nongstoin, Mawkyrwat bad kiwei kiwei ki District.
Na ka liang ka kynhun All Meghalaya Alive & Fresh Fish Supplier Association ka la pyntip ba ka jingdie ia ki dohkha im kan sdang naduh lashai ka 14 tarik Risaw 2025 naduh ka por 6 baje mynstep haduh 10 baje mynsngi.
