Ka ophis jong u Superintendent of Police, Jowai haka kyrwoh khubor bala phah mynta ka sngi, la pyntip ba haka 06.10.2025, na ka liang ka ïingkashari jong ka Special Judge (POCSO), Jowai kala rai pynrem ïa u Brightstarmi Nangbah uba dei naka shnong Laskeiñ hapoh ka kyndon Section 3(a)/4 jong ka POCSO Act, 2012, halor ka kam leh beijot jong u ïaka khynnah kaba dang rit ka rta.
Katkum katei ka mukotduma bala ujor (FIR) haka 04.11.2019, utei u runar ula leh beijot ïa ka khynnah kynthei kaba dang 14 snem ka rta kaba la jia naduh u bnai Nailur, 2018 bad ula byrngem ruh ïa katei ka khynnah ba kan nym ïathuh briew eiei halor kane ka jingjia.
Ïa kane ka mukotduma la register kes ha Jowai PS C/No. 140(11)19 U/S 5(l)/6 POCSO Act bad ïa ka jingtohkit la shañiah ha ka SI kong I. Kharpran ban leh ïa kaba donkam.
Hadien ba la pynkut ïaka jingbishar, ka Kashari ka la rai pynrem ïa u Brightstarmi Nangbah da kaba rai set phatok 10 (Shiphew) snem ryngkat ka kuna kaba Rs. 20,000/- (Arphew hajar) tyngka bad lada um lah ban siew ïa ka kuna u lah ban shah pynjlan ka jingset phatok sa 6 (Hynriew) bnai.
