U Bah Adelbert Nongrum, MLA North Shillong hynne ka sngi u la leit ban kynduh dalade ia u Symbud Myntri Rangbah ka jylla Bah Sniawbhalang Dhar uba dei ruh u Myntri ba khmih ia ka Tnad Transport ban iakren halor ka jingdon ki Kompeni be-aiñ ha ka jylla kiba la kamai ar shaka khlem pat pyndep ban iaid katkum ka kyndon jong ka Meghalaya Aggregator Operational Rules (MAOR) 2023 bad halor ka jingbym pat ioh Laisen ban kamai.
Ha ka jingioh iakren bad u Bah Adelbert, la ong ba ka jingwan jong u ban ai jingthoh sha u Symbud Myntri Rangbah ka long namar u iohi ia ka jingkyrduh kam jong ki Samla bad ruh namar ba u la ioh ia ka jingujor na ka Kompeni Jets 24×7 kaba don ha Jaiaw, Shillong.
U Bah Nongrum u la ong ba ka jingdon jong ki Kompeni na shabar (Rapido) ka la ktah ia ka kamai jong ki samla kiba la trei shitom ban sdang ia ka kam ha la ka Jylla. Ym tang katta, u la ong ba ka Jets ka la pyndep ia ka registar bad ka MAOR naduh u snem 2023 katba ki Kompeni na shabar ki khlem pat don ki kot ki sla ba biang. Shuh shuh u la ong ba ka Kompeni na Jylla ka ai ka jingshngaiñ namar ki la dep ruh ban ithuh da ki bor pulit bad DTO.
U Bah Nongrum u khmih lynti ba ka tnad kan pyrkhat ia kane ka mat khnang ba ki samla wad kam kin lait na ki kam sniew bad u drok da kaba kyrmen ruh ba kin pynkloi ban ai ia ki Laisen ia kiba la dep ban apply 11 bnai mynshwa.
U Bah Adelbert u la ong ba u Myntri u la Kular ban shimkhia ia kane ka bynta bad un khot ruh ia ki ophisar ban iatai halor kane ka mat.
