Ka seng ki longkmie Dongneiñ Sohmynting ha ryngkat ka Dongneiñ Sport & Cultural Club, West Jaiñtia Hills District ha kane ka 26 tarik mynta u bnai kila pynlong ia ka prokram ban rakhe ïa ka jinglehkmen Republic Day ba 73 jong ka ri.
Ia kane ka jingrakhe la pynlong ha madan Ktiehheh Dongneiñ, la pynher ïa ka lama lai rong ka Ri da ka kongsan samla Planky Pyrtuh bad la shim bynta lang ha ka jingrwai ïa ka National Anthem.
Na ka liang ka kongsan samla Planky Pyrtuh haba ai jingkren ka pynpaw ka jingsngewnguh ïa ki riewkhraw jong ka Ri kiba la don bynta ban ïakhun na ka bynta ban pynïoh laitluid ïa ka Ri bad kumjuh ïa ka jylla Meghalaya.
Ka la ong ruh ba ki kynthei ne longkmie ki don ka bynta kaba kongsan tam ha la ïing ne ha ka imlang ka sahlang ka ban ruh ïa ki kyntien ‘ba ka kynthei kaba stad ka tei ïa ka longïing ka longsem bad ïa ka imlang ka sahlang’, hynrei ka kynthei kaba beit kala long pynban ka jingthut ha ka ïing ka sem.
Ha kane ka sngi la ioh ïa ki jingshad, ki jingrwai, ki sport bad ki jingpyni riam tynrai.
Ïa ka jingïalang ha katei ka sngi la pynïaid da ka Dr. Arkidon Pyrtuh Chairperson ka Seng longkmie, la ïoh ïa ki kyntien pdiang sngewbha na u Wailad Suting, Vice President ka Dorbar Dongneiñ Sohmynting, kiwei de kiba la ai jingkren ki kynthup ïa u ma Simon Pyrtuh, u Dapoi Pyrtuh Waheh Shnong warim, u ma Bravestar Phawa bad kiwei de.
