Ka Jarain Government L. P. School ia kaba la seng naduh u snem 1910 kala ioh ban plie ia ka ïing skul ba thymmai jong ka mynta ka sngi lyngba u MLA ka thaiñ u ba dei ruh u Myntri ka Pule Puthi ka sorkar jylla u ma Lahkmen Rymbui.
Ia ka jingialang plie paidbah ïa ka ïingskul thymmai jong ka Jarain Government Lower Primary School, la pynlong mynta ka sngi ha phyllaw jong kane ka ïingskul ha kaba u ma Lahkmen Rymbui, ula long u kongsan, ha ka jingdonlang u ma Jamshaphrang Pohtam (MDC, War Central), ka Deibor Patrecia Lytan (I/C SDSEO, Amlarem Sub-Division), ki nongialam shnong, ki nonghikai, ki khynnah skul bad ki paidbah nongshong shnong Jarain. Ia kane ka jingtei la tei hapoh ka Special Rural Works Programme (SRWP) 2023–24.
La sdang ïa ka jingïalang da ka jingkren pdiang burom jong u Chairman, School Management Committee (SMC), bud sa ka jingrwai kyrpang bad ka jingshad tynrai na ki khynnah skul Jarain Government L. P. School bad Amwi Jarain U. P. School. La ïoh ruh ïa ki kyntien jingkren lyngkot na u Manner Myrmen (Chairman), kong Lahba Pamthied (Retd. Head Teacher), kong Florimai Mukhim (Head Teacher) bad ma Jamshaphrang Pohtam (MDC, War Central) kiba pynpaw ïa ka jingdonkam jong ka pule puthi bad ka jingïatreilang jong ka shnong.
Ha ka jingkren jong u ma Lahkmen Rymbui la pynpaw ïa ka jingkmen halor ka jinglong ka skul kaba rim tam ha kane ka thaiñ bad la pynpaw ruh ïa ka jingai jingkyrshan jong u sha ka pule puthi ha ki thaiñ khappud. U la kdew ba la pyndonkam ïa ka ₹20 lak hapoh ka Border Areas Development Programme (BADP) na ka bynta ka jingtei ïa ki jaka pule bad ka jingpynbha ïa ka iing skul. Shuh shuh, u la ai ruh ₹9 lak na ka MLA Scheme ban pynkhlaiñ ïa ki jingtei bad ki jingdonkam ha ka skul. U la pynbna ruh ba la buh bynta pisa ₹8–₹14 lak hapoh ka PM-POSHAN (Mid-Day Meal) Scheme na ka bynta ka jingtei ïa ka ïing shetja bad umbam umdih ba khuid.
U MLA la pyntip ruh ba la ai ïa ka work order kaba ₹10 lak na ka bynta ka Seng Pynryumlang Ki Hyntha School ban pyndep ïa ki jingtei ba kham bha, bad la khmih lynti ruh ban ïoh ₹2 klur hapoh ka BADP na ka bynta ka jingpynbha ïa ki lynti syngkieng hapoh shnong Jarain bad ki shnong ba marjan. U la kdew ruh ba kine ki kam ki iadei bad ki skhim jong ka Sorkar Pdeng, Pradhan Mantri Adi Adarsh Gram Yojana (PMAAGY) bad PM Janjatiya Unnat Gram Abhiyan (PM-JUGA), kiba ai ₹20.39 lak sha man la ki shnong na ka bynta ki jingtei kum ki skul, ki jaka sumar, um bam bad ki surok.
U ma Rymbui la ong ruh ba ka jingpyntrei ia ka Hospital ha katei ka thaiñ ka dang ïaid shaphrang bad u kwah ban khot ïa u Myntri Rangbah ka Jylla ban wan sha Jarain ha ka jingrakhe ia ka Golden Jubilee jong ka Amlarem Sub-Division ha ka 12 tarik u Naiwieng 2025, na ka bynta ka jingplie bad jurip ïa ki kam pynroi bapher bapher hapoh ka thaiñ.
U la kyntu ïa ka Village Defence Party (VDP) bad ki kmie ki kpa ba kin long kiba husiar ban peit ia ka jingshong shngaiñ ki khynnah. U la kyrpad ïa ki khynnah skul ba kin trei shitom, kin nang ban seng kam lajong bad kim dei ban shaniah tang ha ki kam Sorkar. U la ai jingiaroh ruh ïa ka skul halor ka Kitchen Garden, kaba la ioh ban pynmih haduh 20 kilo u French beans.
La pynkut ïa ka jingïalang da ka jingai khublei na ka kong Imonmi Suting (Assistant Teacher) bad ka jingrwai ri na ki khynnah skul. Kane ka jingplie ïa ka ïing skul thymmai jong ka Jarain Government L. P. School, kaba la ïaid lynti la palat shi spah snem, ka long kum ka dak jong ka jingkiew shaphrang ha ka pule puthi bad ka jingïatreilang hapdeng ka Sorkar bad ka shnong ban kyntiew ïa ka jingnang jingstad bad ka roi ka par ha ki thaiñ nongkyndong jong ka Meghalaya.
