Ki khun ki hajar jong ka Hima Langrin ha ka sngi Palei ka 16 tarik u Risaw 2025 ki la leit buh da ka jingthoh sha u Executive Member jong ka Khasi Hills Autonomous District Council badei khmih ia ka Elaka u bah Denzil R Chen halor ka jingdawa ban pynlong noh ia election ba thymmai na ka bynta ban jied ia u Syiem ba pura u jong ka Hima hadien ka Jingshah suspend u Nongtei Singh Syiemiong kum u Syiem jong ka Hima Langrin ha u bnai Nailar jong u snem 2023.
Haba kren lyngba ki lad pathai u bah Faindness Syiemiong badei nongshong shnong jong ka Langrin u la ong ba ki la kyrpad ia ka Council ban dawa pynlong noh da ka election kaba thymmai na ka bynta ban jied noh ia u Syiem ba pura jong ka Hima namar kumba long mynta ka Hima ka shu don ia u Acting Syiem bah Brilliant Syiemiong.
U la iathuh ba na ka liang u EM u la pyntip ba un sa ai ia ka order hadien ba la dep ka session jong ka District Council.
Kumban shu pynkynmaw ba ka KHADC ka la suspend ia u Syiem jong ka Hima Langrin u Nongtei Singh Syiemiong namar ki kam lehbor jong u hapoh ka Hima.
