Ka JSU Khiehriat Circle mynta ka sngi ka la hiar sha ka shnong Mynkre, East Jaintia Hills District ban leit jngoh da la jong ki khmat ia ka jaka tylliat maw jong ka G.R Infra Project ba khmih da ka NHAI bad ka seng ka lah shem ba ka karkhana tylliat maw ha kane ka jaka ka long kaba i saitmet namar ka jingpynmih palat iaka tdem bad ki pum pum kiba lah ban ktah ia ka koit ka khiah jong ki nongshong shnong bad ia ki wei pat ki shnong kiba marjan.
Ki nongialam ka seng JSU Khliehriat kiba kynthup ia u President u samla Livingson Sama bad u Vice Presisent u samla Laski Siangshai ryngkat bad ki dkhot ka seng ki lah ioh ban iakren bad u nongpeit ia kane ka karkhana ha kaba ka seng ka la phah khang shuwa shipor tad haduh ba ka company ka lah ban buh da ki filter kiba biang ban iada na ka jingpynmih tdem palat pud bad kumjuh ruh ban buh da u tyndong tdem u ba jrong ban lait na ka jingktah ia ki paitbah bad ki shnong ki thaw.
Na ka liang u President ka seng u la ong ba ka seng kan iai bud dien haduh ba ka karkhana kan da pynbiang ia ka jingdonkam ban lait na ka jingshah ktah ki paitbah bad ki nongshong shnong na ka tdem ba mih na kane ka karkhana tylliat maw jong ka NHAI.