Ha ka jingialang ba shisien shisnem jong ka Meghalaya Civil Service Officer’s Association (MCSOA), ia kaba la pynlong ha State Convention Centre Shillong, u Myntri Rangbah ka Jylla, Conrad K. Sangma u la ong ba u angnud bad iai buddien na ka bynta ba ka Jylla Meghalaya kan ioh noh la ka jong ka Meghalaya IAS Cadre na ka bynta ban pynsuk bad pynmyntoi ia ki paidbah ka Jylla.
Haba ai jingkren ha kane ka sngi, u Myntri Rangbah u la iaroh ia ki ophisar kiba la trei shitom na ka bynta ban pyntyllun ia ka kam ha kine ki snem ba lah leit. U Sangma u la iathuh ba ia kane ka mat u la rah sha ka Sorkar pdeng naduh u snem 2019 da kaba khmih lynti ruh ba kan urlong noh ha kine ki snem ban wan. U MR u la ban bunsien ba kadei ka kamram jong u ban pynioh ia kaba donkam na ka bynta u paidbah bad kata kadei kaba u buh thong man ka sngi.
Na ka liang u President ka MCSOA u Ashish Sangma u ai khublei ia u Myntri Rangbah halor ka jingshimkhia bad ka jingdon ryngkat bad ka tnad. U Ashish u la buh shibun ki mat na u MR kynthup ban pynjlan ia ka rta Shongthait na ka bynta baroh ki nongtrei sha ka 60 snem.
