U District Magistrate ka West Jaiñtia Hills u la pynmih ïa ka hukum katkum ka kyndon 163 BNSS kaba shah ban pynbthei bom pataka ha ka sngi Diwali tang hapoh ar kynta kata naduh ka por 8 baje mynmiet haduh ka por 10 baje mynmiet.
Ka hukum ka khang ban die, thied, ne ban thied ïa ki bom ba la shna nabar ri bad ban pyndonkam ïa ki bom ba la pynïasoh lang (series crackers or laris), kiba wanrah ïa ka jingpynjaboh ia ka lyer, ka jingsawa, bad ki jaboh jabaiñ. La khang ruh ia ka jingpyndonkam ïa ki bom kiba pynmih ïa ka jingsawa kaba palat ia ka 125 dB (A1) lane 145 dB (C) pk ha ka jingjngai kaba 4 meter na ka jaka ba bthei.
Kane ka hukum ka khang pyrshah ruh ban pynbthei ïa ki bam patak hapoh 100 meter na ki hospital, ki jaka sumar tymmen, ki primary bad district health care centre, ki jaka pule, ki ïingbishar, ki jaka leh niam ne kino kino ki jaka kiba la pynbna kum ki Silent Zone.
Shuh shuh ka jingdie ïa ki bom pataka kan long tang lyngba ki nongkhaïi kiba la ioh laisen, bad ki nongkhaïi kiba la ioh laisen ba die ïa kito ki bom kiba ai jingbit da ka ophis jong u Deputy Commissioner, West Jaintia Hills District, Jowai bad kiba long katkum ki jingbthah jong ka Central Pollution Control Board.
Katkum katei ka hukum, katei ka jingkhang kan treikam noh mardor bad kan dang treikam haduh ban da kut ka jingrakhe ïa ka jinglehkmen Diwali.
