Ka ophis jong u Superintendent of Police, ka West Jaiñtia Hills District, Jowai haka kyrwoh khubor bala phah, la pyntip ba ha ka sngi 17.10.2025 ka ïingkashari ba don burom jong ka Special Judge (POCSO), Jowai kala rai pynrem ïa u Gentlyness Pasleiñ uba dei na ka shnong Nongryngkoh hapoh ka kyndon Section 4 jong ka POCSO Act, 2012, halor ka kam leh beijot jong u ïa ka khynnah kaba dang rit ka rta.
Katkum katei ka mukotduma bala ujor (FIR) ha ka 11.01.2016, utei u runar ula leh beijot ïa katei ka khynnah kynthei kaba dang 7 snem ka rta ha ïing sah jong ka.
Ïa kane ka mukotduma la register kes ha Jowai PS C/No. 12(01)16 U/S 4 POCSO Act bad ïa ka jingtohkit la aiti ha ka SI kong R.M Suchiang ban leh ïa kaba donkam.
Hadien ba la pynkut ïaka jingbishar, ka Kashari kala rai pynrem noh ïa u Gentlyness Pasleiñ da kaba set phatok 10 (Shiphew) snem ryngkat ka kuna kaba Rs. 10,000/- (Shiphew hajar) tyngka bad lada um lah ban siew ïa ka kuna u lah ban shah pynjlan ka jingset phatok sa 6 (Hynriew) bnai.
