[Photo credit : ITNE]
Ka tnat jong ka sorkar pdeng ka Centre for Environment Protection and Rural Development (CEPRD) ka la pynrem jur ïa ka sorkar Jylla (Meghalaya) halor ki kam tih dewiong kiba dang ïaid shakhmat mynta ha Paromgre hapoh ka Chokpot ha South Garo Hills.
Kane ka tnad ka ong ba ki long kiba pynsniew ïa ka mariang, ki bym lah ban pynneh pynsah katkum ka aiñ, bad ki bym iahap bad katkum ka stad saian (Scientific mining) kaba la ailad ban tih ia u Dewiong hapoh ka Jylla.
Ha ka jingkynthoh kaba jur ka CEPRD kala kynnoh ba ka jylla Meghalaya kam burom ïa ka riti synshar bad ka jingkitkhlieh halor ka jingpynneh pynsah ïa ka mariang da kaba ka ailad bad shah ban tih ïa u Dewiong ha katei ka jaka kaba donkam ban pynneh pynsah. Ka la kynthoh ba ka jingong ba la pyntrei da ka “scientific mining” kam long kaba shisha bad kane ka jingtih dewiong ha katei ka jaka kala wan rah pynban ia ka jingduh ki khlaw ki btab, ki jingim ba don hapoh khlaw bad ka ktah ruh wat ia ki nongshong shnong ha katei ka jaka, la pynpaw ka CEPRD.
