Ka Jaiñtia Joint Alliance (JJA) kaba kynthup ïa ka WJSU bad ka JYF kala phah da ka jingthoh sha u Myntri Rangbha duh ka jylla u Conrad K. Sangma lyngba ka ophis u DC halor ka jingpyrshah jur ïaka jingkam u Myntri Rangbah ka Assam ba ka Block I bad ka Block II kiba dang hap mynshwa hapoh ka United Khasi-Jaintia District ki dei ki jaka jong ka Karbi Anglong bad shen ka Assam kan leit ban thung ïa ki mawpud.
Ka JJA ka ong ba kane ka jingkam u Myntri Rangbah ka Assam ka ktah ïa ka jingsngew jong ki paidbah Khasi-Jaiñtia, kumta ka Alliance ka kyntu jur ïa u Myntri Rangbah ka Jylla Meghalaya bad ïa ka sorkar hi baroh kawei ban pyrshah jur ïa kine ki jingkren jong u Myntri Rangbah ka Assam namar ïa kane ym lah ban pdiang satia da ki paidbah ka ri Khasi-Jaiñtia.
Na ka liang ka seng kala kren shai ba kam ailad satia ba ki jaka ki puta jong ka jylla kin shah knieh ne shah shim noh da ki bor ba nabar. La kyrpad ruh ïa ka sorkar jylla ba kan shimkhia mardor ïa kane ka kam kaba dei ka hok ka kynti jong ka jylla Meghalaya.
