Ha ka sngi sdang ka Dorbar Tlang jong ka Khasi Hills Autonomous District Council (KHADC), ki MDC ka liang Synshar, kynthup ruh na ka Liang pyrshah ki la mynjur da kawei ka jingmut ban phah da ka jingthoh sha ka Ministry of Environment Forest & Climate Change (MEFC) na ka bynta ban weng noh ia ka Dorkhas (Office Memorandum) ba la pyllait da ka Supreme Court (SC) ha ka 8 Nailur 2025 kaba ong, ba ka Sorkar India kan ym sngap shuh ia ka sur u Paidbah (Public Hearing) na ka bynta ban tih ia uno uno u Mar ‘Poh Khyndew uba don ha ka Ri India.
Namar ka jingsyier ba ioh lehse katei ka rai jong ka Supreme court ka dei ban khlong noh ia u Uranium uba don ha ka Jylla, la iatai ia katei ka mat hynne ka sngi ha kaba la ioh ruh ia ka jingkyrshan lang jong baroh ki MDC.
Na ka liang u CEM ka KHADC Bah Winston Tony Lyngdoh u la pule ia katei ka jingthoh da kaba kdew bad kyrpad ia ka MEFC ban pyllait noh ne ban ym kynthup ia katei ka hukum na ka KHADC.
Haba sdang ban iatai ia katei ka mat, na ka liang u Bah Titos Chyne MDC Sohra Constituency uba dei ruh u Nongïalam ka Liang pyrshah, u la mynjur ia katei ka rai hynrei ula ai jingmut ia u CEM ban bsut shuh ia ka kyntien ban ‘Weng’ (Withdraw) ha ka jaka jong ka kyntien ban ‘Pyllait’, namar lada pyllait tang ia u Mar ‘Poh Khyndew uba don ha u pud u sam jong ka KHADC bad shah ban khlong ia u Mar hapoh u pud jong ka JHADC bad GHADC kan ktah lang ia ki briew kiba don ha u pud u sam jong ka KHADC.
Katba na ka liang ka Kong Grace Mary Kharpuri MDC Nongshken Constituency ka la iathuh ba ia katei ka mat la ju pyrshah da ka EC barim naduh kine ki snem ba lah leit bad ym ju ai ruh ia ka No Objection certificate (NOC). Shuh shuh ka la ong ba katei ka jingthoh ka la biang bad lada long kaba lah dei ban iakren bad ka JHADC bad GHADC na ka bynta phah da kawei ka shithi kum ka dak ka jingmynjur ban weng noh ia katei ka hukum na ka Jylla.
