Ha ka sngi ba ar jong ka Dorbar Tlang ka KHADC, u Bah Powell Sohkhlet, Executive Member ba khmih ia ka Tnad Kam Pynroi u la pynpaw ka jingbitar ia u Bah Titos Chyne, MDC Sohra Constituency halor ka jingkylli bad ka jingiatai na ka bynta ka Skhim lane ka pisa ba sahkut na ka bynta ka 2nd Installment jong ka “Tied & Untied Grant 2021-2022”.
Ia katei ka mat la wanrah da ka Kong Grace Mary Kharpuri, MDC Nongshken Constituency ha kaba ka la pan ka jubab na u Bah Powell ba dei ban ai ia ka tarik u bnai bad snem ba tikna na ka bynta ba kin ioh noh ia katei ka bynta ba ar (2nd Instalment).
Haba jubab ia katei ka jingkylli, u Bah Sohkhlet u la ong “Ngi dang khyndiat por, watla katta ngim shym la shong thiahthai. Ngi hap ban pyndep katkum ka jingbtah jong ka Sorkar bad ki don haduh 6 tylli ki kyndon ba dei ban pyndep, hadien kitei ngin sa ioh” jubab ong u Bah Powell.
Namar bym hun ia ka jubab, u Bah Titos Chyne u la ieng bad ong “La ioh jingtip ba lah dep ban upload hapoh ka portal, kaei ka jingeh ba ngim lah ban ioh ka ka pisa jong u 2021-22”.
Wat hadien ba la jubab bad pynshai sha ka Dorbar ia kitei ki jingeh, u Bah Sohkhlet u la hap ban ieng bad ban biang sa shisien ba ka daw ka dei namar ba hap ban pyndep ia kitei ki jingbthah kiba kynthup ruh ia ki kam kiba pyndonkam da ki kor Internet.
Hadien katei, u Bah Titos u la woh bad kylli shi kylli ia kajuh ka jingkylli da kaba ong ruh ba kumno ka 1st installment ka iaid ka ba ar pat kam iaid. Hadien katei, da ka jingkhluit u Bah Sohkhlet u la jubab “Peit ia ka jong ka Lyngkdong ruh. Kane ka kam kadei naduh 2021-22, ngi dang wan ha u 2025. Katkum ka jingbtah ba dei ban pyntreikam da ka online hynrei phi iaid da ka offline, dei na kata ka daw ba sahkut kine baroh. Aiu phi la leh??.” kren siat u Bah Powell ia u Bah Chyne ia ka jingbym pyntreikam ia katei ka jingbtah naduh ka por ba u synshar ha KHADC ha kine ki snem ba lah dep.
Namar ka Dorbar ka la sdang khluit, la pynjaijai ia ka Ïing da u Shongknor da kaba ong ba kane ka mat ka la shai bad la ia sngewthuh lang.
