Ki nongialam ka Meghalaya School Welfare Association (MSWDA) Central Body ki la iakynduh ia ki ophisar ka Directorate of Educational Research & Training (DERT) bad ia u Director jong ka Meghalaya Board of School Education (MBOSE) ha kaba iadei bad ka jingpynkylla ia ka jingkylli jong ka Meghalaya Board of School Education naduh Ki klas 6 haduh 9.
Haba kren sha ki lad pathai khubor, u President ka MSWDA u Bah Hamarbamut Marbaniang u la ong ba ka Association ka la ioh jingtip ba la wanrah ia ka rukom treikam kaba thymmai ha kaba ki skul ne ki nongwad bniah hapoh jong ki kin nym shah shuh ban set ia ki kot jingkylli bad ïa ki kot jingkylli yn pynkhreh beit beit da ka DERT jong ka tnad sorkar — bad nangta yn sam sha ki ophis jong ka DSEO/SDSEO lyngba ka digital system jong ka DCIL.
U la bynrap katkum ka jingpynshai la iathuh ba naduh klas 6 haduh 9, baroh ki kot jingkylli yn set da ka DERT.
Ia kine ki kot yn phah sha ki ophisar jong ka pule puthi ha ka kyrdan jong ka District (DSEO/SDSEO).
Nalor kata u la ong ba kane ka jingpynkylla ka long ka sienjam kaba bha bad lada ioh ka jingpynshai kaba khambha bad ka jingkyrshan na ka sorkar , Hynrei ka jingkulmar ka mih hapdeng ki skul, kiba bun na ki ki la ngeit ba ki dei ma ki hi ki ban buh ia ki kot jingkylli, kumba ju long man la u snem.
U la pynskhem ba ka MSWDA ka khmih lynti ba ka sorkar kan pynshai shwa ïa ka rukom treikam ha khmat ki paidbah khnang ban ïada na ka jingkulmar ne jingpynsngewthuh bakla hapdeng ki skul khamtam haba la pyntreikam ïa ka rukom sam jingkylli digital ba la pynskhem da ka DCIL.
Ka Association ka la kyntu ruh ia ka sorkar ba ka dei ban ailad ia ka por pynkhreh kaba biang bad ai jinghikai ia ki skul khnang ban lait na kino kino ki jingthut ha ka por ba leh eksamin.
