Ki nongshong shnong ka Mynsngat WJHD mynta ka sngi 25 tarik u Risaw, 2025 kila leit ban buh ïaka ejahar (FIR) ha Nartiang Police Station hapoh ka jingïalam u ma Phresmi Suting pyrshah ïaka tnat Public Health Engineering Department RWS Division Jowai bad ïa ki Chairman, Secretary VWSC ka shnong Mynsngat halor ka jingkynnoh bamsap ïa ka Scheme Swachh Bharat Mission.
Katkum ka RTI ba la ïoh da ki nongujor na ka ophis PHE RWS Division Jowai ki don haduh 164 tylli ki longïing kiba ïoh myntoi na kane ka Scheme Swachh Bharat Mission, hynrei la shu paw tang ka kyrteng khlem ïoh ïa ka pisa lane ka jingpyntrei kumba la mang da katei ka tnat PHE RWS Division Jowai, ïa ka Work Order lah dep pyllait naduh 06-September-2024 bad ki nong ïoh bynta kim tip ei ei tad ynda la ïoh ïa ki jubab RTI na ka ophis PHE RWS Division Jowai kin sa paw ki kam bamsap.
Halor kane kila dawa na ki bor ka aiñ ban kem bad pynshitom da ka ba tyngeh ïa kiba don kti ban pyndon kam bakla ïaka pisa paitbah bad ki dei ruh ban shah pynsaja katkum ka aiñ.
La pynsngew ba ka Scheme Swachh Bharat Mission ka dei ka mission baka sorkar ka buh ban ai paiñkhana ha man ki thliewïing baduk ban rat dyngkhong ïaka jingleit paiñkhana pathar hynrei ka dap tang daka jing bamsap. Kumno kim lehraiñ ban bam ïaka hok u duk u suk la kynnoh ki nong ujor.
Shuh shuh la ong ka Scheme Swachh Bharat Mission ka dei ban long ka rukom treikam kaba pynbit pynbiang ïaki longïing baduk da kaba ai paiñkhana ban rat dyngkhong ïa ka jingleit paiñkhana pathai.
Hynrei mynta kane ka scheme kala kylla long tang ka lad ai bam ïa kiba don kti hapoh ka jingtreikam jong ka tnad PHE RWS Division Jowai bad ka V.W.S.C Mynsngat. Kane ka long ka jingbymman kaba khlem da lehraiñ, la dawa na ki bor ka aiñ ba kin kem bad pynshitom katkum ka aiñ ïa baroh kiba donkti ha kane ka jingbamsap kaba ktah ïa ka hok jong u paidbah bad uba duk uba suk.
Katkum ka kyrwoh na ka Phresmi Suting la pynpaw ruh ba kin ym shong kli kti bad ki kloi ruh ban ïai pyrshang ban buddien haduh ban da ïoh ïaka hok jong ki bad kumjuh ïa ka hok jong ki paidbah baroh.
