La pynlong ïa ka prokram sah jingkynmaw ka jingdap 35 snem ka lyngkhuh sngi ïap u Captain Williamson A. Sangma, u myntri rangbah ba nyngkong duh ka Meghalaya ha Tura, sngi Saitjain.
Ka mat ba hakhmat eh jong kane ka prokram kadei ban kynmaw burom ïa une u riewkhraw, riewsainhima da ka jingïohi jngai bad ka mynsiem ba shitrhem jong ka jingīalam lynti ha kaba la lah ban thawdur ïa ka Meghalaya da ka lynti kaba suk.
Kum shibynta jong kane ka prokram, la pynlait paidbah ïa ka kot “Capt. Williamson A. Sangma — Architect of Meghalaya” ba la thoh da u Andrew Simons uba dei u Commissioner & Secretary of Meghalaya Legislative Assembly. La pynlait ïa kane ka kot da u lamphang badon burom ka Meghalaya Legislative Assembly, u Thomas A. Sangma uba long ruh kum u kongsan ha kane ka por.
La sakhi ïa kane da ka jingīadon lang u Cabinet minister Brening Sangma, Malthus A. Sangma, ki official jong ka Assembly Secretariat, kiba haïing u Capt. Sangma, ki khynnah skul bad college, bad kiwei de ki riew pawkhmat.
U lamphang u pynkynmaw ïa ka jingīadei jong u bad u Capt. Sangma ha ki por ba u dang long Chief Minister. U lamphang u la biria ruh ba ki shait ïa tyngkhuh ka khlieh ha ka por ba ki īaid lynti jngai namar ba la shoh samthiah palat hapoh kali!
U Thomas u ong ba da ka jingtrei shitom bad aiti lut na ka bynta ka synshar bad sainhima kaba khuid bad ka jingwanrah ïa ka suk ka sain kaba u Capt. Sangma uba la lah ruh ban pynïoh ïa ka jylla Meghalaya khlem ka jingïaumsnam bad kat kum u Captain — ka jingïaumsnam kan pynkha shuh shuh ïa ka jingïaumsnam, ym da kumwei pat.
U lamphang u la batai shaphang u Captain Sangma ba u long u briew uba don ka jingshlur kaba pher na kiwei bad kaba wanrah ïa ka jingïatylli, bad ka jingsynshar kaba beit ba ryntih hala ka nongrim.
U lamphang u la ïaroh ïa ka jinglah jong u Captain ban wanrah ïa ka jingïatylli hapdeng ki Khasi, Jaintia, bad Garo. Da ka jinglong nongïalam bakhraw jong u, la lah ban wanrah ïa ka jingïatylli jong ki lai tylli ki thain ba don hapoh ka jylla.
Haba kren pat shaphang kane ka kot ba la thoh da u Andrew, la ai ka jingsngewnguh bad burom sha kiba haïing u Capt. Sangma bad sha ka Meghalaya State Assembly Library kaba la pynïoh ïa ki jingdonkam haka ban buh record ïa kane ka kot.
U Dr. Simons u īathuh ba kane ka kot kan pynïoh jingmyntoi shikatdei ïa ki khun ki hajar ka jylla jong kane ka juk bad ha ka lawei kumjuh, ka ban ïarap ïa ki ban sngewthuh ïa ka jinglong nongalam u Capt. Sangma, khamtam ka jingbym pdiang jong u ïa ka jingïaumsnam.
U Simons u la bynrap ba wat la um ju ïakynduh markhmat bad u Captain Sangma, hynrei uba shim hakhmat eh ïa ka jingsuk, ka jingïatylli bad ka jingsynshar kaba khuid na ka bynta ka Meghalaya kaba mynta bad ka lawei jong ka, u la pynkut.
