Ka Jowai Consumer Co-operative Store, kawei na ki Co-Operative Society kaba la sdang naduh u snem 1963 kaba don ha jan Khyriem Meghalaya Studio, Īawmusiang Jowai mynta ka sngi (31/01/2022) kala pynkup burom ia u ma S. Quotient Sumer ha ïingsah jong u ha Laloo Vaza Jrongmoosiang Panaliar, Jowai.
Kala don ka jingialang kaba lyngkot kaba la pyniaid da u Chairman ka Jowai Consumers Co-operative Store u ma O.C Lakiang bad la ioh ka jingkren na u ma Hunmon Sutnga uba dei u Secretary jong kane ka Store.
U ma Sutnga ula iathuh ba katkum ka jingshem lyngba ki rikot la lap ba u ma Quotient u dei u wei na ki nongseng ia kane Store, kumta ki nongpyniaid ka Board of Director kila shim ia ka rai ban leh ei ei na ka bynta une u rangbah wat la ka dei kaba rit ruh. Kumta da kawei ka jingmut kila buh ia ka sngi ban pynkup burom noh ia u ma Quotient mynta ka sngi.
Ha kane ka sngi la ioh ia ki kyntien kyrkhu kyrdoh ia u ma Sumer lyngba ki nongkitkam jong kane ka Store bad la pynkup ruh ha u ia ka jaiñ Ryndia Tlem bad ai ruh ia ka Memonto sah kynmaw.
Na ka liang jong u ma Quotient Sumer ruh ula pynsngew ia ka mynsiem jingsngewkmen namar ba ki dkhot ba mynta ki dang tip ban peit ia ki kam jong ki nongseng ne ki nongbuh. U la pynkynmaw ba kumno la sdang ban seng ia kane ka Store bad na kaei ka daw bala seng ia ka. Ula iathuh ba ka jingdon jong kane ka Store ha kita ki por ka la long shisha ka jingkyrkhu ia kiba duk ba kyrduh, namar ba kane ka Store ka lah ban die ia ki mar ha ka dor kaba duna haba ia nujor bad kiwei pat ki jaka die kum ia ki jaiñ khunlung, ki kopi bad kiwei de ki tiar.
La ioh ruh ka jingkren na kiba ha ïing bala kren da u ma Riquoma Rq. Laloo u khun nyngkong jong u ma Sumer. U ma Riquoma ula ong ba ka jingithuh ia ki nongseng nongbuh ka long ka jingkyrkhu ia ki nongrap pateng. U kitbok kitrwiang ia kane ka Jowai Consumers Co-operative Store ba kan nangiaid shaphrang bad nangiar shuh shuh. U la ai khublei kyrpang ruh ia ka Board of Director kane ka Co-operative Store kiba la lah ban pynlong ia kane ka jinglehburom ia u Kpa jong ki bad u ong ba kane kan long ka jingsah kynmaw pateng ha ka longïing jong ki.
Ia ki kyntien ai khublei la ai da ka Riverlincy Lyngdoh kaba la ai ruh ia ka jingkren lyngkot halor ka jingtreikam jong kane ka Store.
Kum ban shu pynkynmaw u ma S. Quotient Sumer dang shen ha u bnai December 2021 ula ioh ka jingpynkup burom ha nongbah Mumbai na ka My Home India kaba la tip kum ka “One India Award” na ka bynta ki kam jong u ha ka imlang ka sahlang, ki kam thoh kot, khamtam halor ka jingthoh shaphang ka jingim jong u Kiang Nangbah.
