Hadien ba la ioh ia ka hukum na ka Supreme Court ha ka 1 Nailur 2025, ka Sorkar Jylla ka la pynpaw ia ka jingsngewkhia ia ki Nonghikai Skul ka Jylla namar ka jingpynmih ia ka hukum ba baroh ki Nonghikai ki dei ban pyndep ia ka eksam Teacher Eligibility Test (TET) namar ka long kaba donkam (Mandatory). Wat hadien ba la mih khohreh da ki Nonghikai ban pyrshah ia katei ka rai, ka Sorkar Jylla ruh ka khlem iehnoh hynrei ka ai ia ka jingkyrshan ban ia mynjur lang bad baroh ki Nonghikai skul ha ka Jylla.
Haba ioh ban iakren bad u Myntri ba khmih ia ka Tnad Pule Puthi ka Jylla, Bah Lahkmen Rymbui u la ong ba ka Sorkar ka la rai ban phah da ka jingthoh na ka bynta ban kyrpad ia ka Supreme Court ban weng bad bishar biang sa shisien ia katei ka hukum ba la pynmih shen.
U Bah Lahkmen u la ong, palat 32,000 ngut ki Nonghikai Skul Sorkar kin shah ktah lyngba katei ka jingpynmih hukum. U la ong ruh ba katei ka hukum kan ktah namar bun ki Nonghikai kiba dang don ha ka kam (service) ki khlem pat pyndep ia katei ka eksam.
U Bah Rymbui u la pynskhem ba ki Nonghikai kiba la pyndep ia ka Meghalaya Eligibility Test kim donkam shuh ban iakhun ia ki eksam ki ban sa wan.
Haba u nongthoh khubor ula ioh ban iakren bad ki katto katne ngut ki nonghikai skul LP kila pynpaw ba ha ka por ba ki aplai ia ka kam nonghikai LP, kim shym la iohi ei ei lyngba ki Advertisement ba ka long kaba donkam ban pyndep ia ka TET na ka bynta ban ioh ia ka kam nonghikai. Hynrei kila ong ba na ka liang ka jong ki kum ki nonghikai, kila pyndep ia ki training kumba la bthah da ka sorkar, kum hapoh BTC bad DIET kiba long ki shlem ai jinghikai jong ka sorkar ia ki nonghikai ban pyntbit ha ka kam hikai. Nalor ba ka jinghikai kaba kila ioh na kine ki jaka da ki shisnem/ar snem ka long kaba biang bad iadei bha ba ka kam nonghikai, kumta ka long kaba pynsngewsih ia ki ban tip ba ka ïing bishar ba hakhliehduh (Supreme Court) jong ka ri ka pynmih ia kane ka hukum bad ki kyrpad ia ka sorkar Jylla ban wad ki lad ki lynti na ka bynta jong ki, kila pynkut.
