Hynne ka sngi ka 29 Risaw 2025, u Zenith Sangma uba dei u para trai jong u Mukul Sangma u la mih noh na ka All India Trinamool Congress (AITC) bad ban wanphai sha la ka Party barim jong u ka Indian National Congress (INC) ryngkat bad 2 ngut ki dkhot kiba kynthup ia u Bah Lionel Nongkhlaw bad u Bah Paulstar Syiem.
Kum ban shu pynkynmaw, u Zenith u la phet noh sha ka AITC hashwa jong ka Elekshon MLA 2023. Hynnin ka sngi (28.10.25), u Zenith u la ai ia ka shithi sha u President ka AITC Meghalaya da kaba kdew ba un hiar noh na ka shuki Vice President bad ban mih noh na ka Party.
Ha kane ka sngi pdiang burom la don ryngkat da u Dr. A. Chellakumar AICC Incharge Meghalaya, President MPCC Vincent H. Pala, MP Lok Sabha Saleng A. Sangma bad kiwei kiwei.
“Nga la kut jingmut ban iasoh biang sha ka longïing barim jong nga kaba dei ruh ka Party kaba la rim, ka Indian National Congress” ong u Sangma. U la iathuh ba kawei na ki daw ba u la wanphai biang sha la ïing ka long namar ka jingiohi ia ka jingsynshar kaba dap tang ka bamsap la ha ka Jylla ne ha ka Ri baroh kawei. “Nga long uba pyrshah bha ia ka jingbamsap. Nga kob ba ym ju don ba lap ia nga ba ngan bamsap ha ka por ba nga long Myntri” ong u Sangma.
U Zenith u la kynthoh ia ka Sorkar kaba synshar mynta ha Meghalaya da kaba la ong ba kane ka Sorkar ba mynta ka la pynjot ia ka Jylla.
Ha kaba kylli shaphang u Hymmen jong u, u Mukul Sangma, u la ong ba kane ka jingmih na ka AITC kam don jingiadei ei ei lane don daw na ka kam ïing hynrei ka dei ka rai shimet.
