Ki nongialam jong ka Raij Namdong ryngkat bad ki 11 ngut ki Waheh Shnong kiba don hapoh ka Raij Namdong ki la mih shaphrang ban pynrem jur ia ka jingleh donbor ka Jaintia Hills Autonomous District Council ia ka kam synshar khadar ha kaba ia dei bad ka shnong Thadmynri Raij Namdong – Elaka Nongjngi.
Ha ka khubor ba la phah da ki nongialam jong ka Raij ryngkat bad ki Waheh Shnong ki la ong ba ka Thadmynri mynshwa ka dei ka khlaw jong ka Shnong Namdong bad ha dien ba la thaw ia ka Raij namdong la sdang ban pynmih ia kiwei pat ki shnong kiba hap hapoh ka Raij Namdong kumta la sdang ban jer kyrteng ia ki shnong kiba hap hapoh ka Raij Namdong Elaka Nongjngi kumne harum
Namdong – A, Myngngor, Namdong – B, Mukoh, Umjalisiaw, Kremmyrsiang, Sase Shong ngiah mynshwa bad mynta Thadmynri, Ladmyngngor, Khansaro, Madanrtiang, Lumrot bad
Mukhnang
Kine ki dei ki shnong kiba hap pura baroh hapoh ka Raij Namdong Elaka Nongjngi, bad baroh ki kam ki jam la leh bad pyndep da ka Raij Namdong bad Elaka Nongjngi naduh ka kam Waheh Shnong kam jied Dolloi bad kiwei kiwei, hynrei kyndit kynsan ha ka 07th – Oct – 2020 ka JHADC ka la pynmih ia ka jingynbna ba ka Shnong Thadmynri ka hap shapoh ka Elaka Nartiang kane ka la pyllong ia ngi kum ka Elaka Nongjngi ka Raij Namdong bad ki shnong ban ia khun haduh Meghalaya High Court bad halor kane ka jingiakhun ka JHADC ka la weng ia ka jingpynbna jong ka ban ithuh ia ka Shnong Thadmynri ba ka hap sha ka Elaka Nartiang ha ka 15th – Dec – 2020 bad ha ka 16th– Dec – 2020 ka Meghalaya High Court badonburom ka la pynmih ia ka hukum ba ka JHADC ka dei ban leh ia ka joint resurvey ia kane ka kam.
Hynrei haduh kine ki sngi ngi na ka liang ka shnong ka raij bad ka elaka hi baroh kawei ngi khlem shah khot lane klem iohi ia kata ka joint resurvey ha pdeng ki dolloi ki nongshong shnong bad ka JHADC hynrei mynta pat ka JHADC ka la phah pynban da ki briew jong ka ban pynrung kyrteng sha kane ka shnong Thadmynri Raij Namdong Elaka Nongjngi ban thep vote dolloi sha ka Elaka Nartiang.
Halor kane ngi la dep buh ia ki jingujor naduh ka Elaka Ka Raij Namdong ryngkat bad ki 11 ngut ki Waheh Shnong, halor kane ngi dawa ba ka JHADC ka dei ban weng mardor bad pyndam shi syndon ia kane ka jinglehbor ia ka kam synshar khadar kum ki riew khlaw ha kane ka juk shai mynta.
Bad lada phi pynksan ia kane phi lah ban khot da ka public campaign lane phi kum ki nongshna aiñ phin pynjot ia ki aiñ synshar u myn barim. Kumta ban pynneh ia ka shongsuk shong saiñ ha ki elaka ki raij ki shnong ki thaw ngi kyntu ia phi ban leh ia kaba dei hok ban leh ym ban shu pynjot ia ki shnong ki thaw ong ki nongialam ka Raij Namdong bad ki Waheh Shnong.