Ka 31 Risaw 2025 kan long ka sngi ban sah kynmaw ha ka Khana pateng jong ka Jylla ha kaba hynne ka sngi, u Myntri Rangbah ka Jylla Conrad K. Sangma u la plie paidbah ia ka Shillong Government College of Engineering ha Mawlai Kynton Massar, Shillong.
Ha kane ka sngi la wan ban don ryngkat da u Symbud Myntri Rangbah ka Jylla Bah Prestone Tynsong, Bah Lahkmen Rymbui Myntri ba khmih ia ka Tnad Pule Puthi ka Jylla, Bah Sanbor Shullai MLA South Shillong bad kiwei kiwei.
Ia kane ka Engineering College ba nyngkong tam ha ka jylla la plie hadien ba la ioh ia ka jingmynjur bad ka jingithuh (Approved) na ka All India Council for Technical Education (AICTE).
Haba ai jingkren ha kane ka sngi, na ka liang u Myntri Rangbah u la ban halor ka jingdonkam jong ka teknology katkum kane ka juk ha kaba mynta ha kaba u la iathuh ruh ba dang shen la dep ban iateh lok bad ka NVIDIA na ka bynta ban kyntiew ia ka Jylla.
Ha ka jingsdang ia kane ka shlem hikai, la shim tang haduh 50 ngut ki khynnah pule bad hadien 1 snem lah ban kyntiew 2 shah, iathuh u Sangma.
