Ki nongtrei hapoh ka lama jong ka All Jaintia Muster Roll Worker Union (AJMRWU) mynta ka sngi ka 3 tarik Naiiwieng 2025 ki la wan iakynduh ia labour Commissioner u Jadish Chelani, IAS ban iakren haba iadei bad ka jingeh halor ka jingslem ban siew ia ka dor bai bylla sngi jong ki nongtrei muster Roll naduh u Bnai Risaw 2023 haduh u Nohprah 2024 ha ryngkat bad ka jingpyntreikam ia ka Basic Daily Allowance.
Hashwa ban kynduh ia u Labour Commissioner ki nongtrei muster Roll ki la pynlong ia ka jingialang ha Shillong Press Club ha kaba ki nongtrei muster Roll na kylleng ka Ri Khasi Jaintia ki la wan sha kane ka jingialang.
Haba kren sha ki lad pathai khubor hadien ba la iakynduh ia u Labour Commissioner na ka liang u President ka All Jaintia Muster Roll Worker Union u Bah Khroo L Pariat u la pyntip ba katkum ka Report ba ioh na ka District Statistics office ka la kdew shai ba ki dor jong ki marbam ki la hiar dor bad lada pyntreikam ia ka Basic Daily Allowance ka dor jong ki nongtrei muster Roll kan hiar hadien ba ka Sorkar ka la pynhiar dor ia Good Service Tax.
Halor kane ka bynta na ka liang ki nongtrei muster Roll ki dawa na ka sorkar ba kan ai da ka jingthoh hapoh shi taiew haba iadei bad kane jingpynbna jong ka sorkar bad ka sorkar ka la kular ban ai da ka jingthoh hapoh ka 1 taiew.
Shuh shuh u la ong ba ka kynhun kan sa khot ia ka jingialang ha ki taiew ba khatduh jong une bnai haba iadei bad ka rai jong ka sorkar ban ai da ka jingthoh haba iadei bad ka jingdawa jong ki Nongtrei Muster Roll.
Khatduh u la ong ba ka kynhun ka la ioh ruh ban pynsngew halor ka jingpynslem ka sorkar ban siew ia ka tulop jong ki nongtrei muster Roll kiba trei ha ka tnad Sericulture & Weaving la palat 7 bnai lynter bad kyntu ia ka sorkar ba kan shimkhia haba iadei bad kane ka jingkynduh jingeh ki nongtrei muster Roll kiba trei ha ka Sericulture & Weaving.
