U District Magistrate, ka East Jaintia Hills District u Shivansh Awasthi, IAS, ula pynmih ia ka hukum mynta ka sngi ban khang pyrshah halor ka jingpyntuid um jaboh jong ki katto katne ki longïing bad ka dukan kiba don harud jong u surok bah NH- 6 sha ki bynta jong u surok, kaba la wanrah ia ka jingjulor bad sniew u surok.
Na ka liang u District Magistrate ula pynpaw ba kane ka jingpyntuid um jaboh/jakhlia ka lah ban buh jingma kaba khraw wat ia ka koit ka khiah jong ki nongshong shnong jong ka District kiba don ha kitei ki bynta.
Shuh shuh la ong ba kum kine ki kam ki long be-aiñ katkum ki kyndon jong ka National Highway Act, 1956 bad kumta, la mana tyngeh ïa baroh ki briew kiba donkti ban leh ïa kum kine ki kam ha shilynter u surok bah NH-6 hapoh ka East Jaiñtia Hills District.
Lada lap ia kino kino ki briew kiba pynkheiñ ïa kane ka hukum kin hap ban shah pynshitom katkum ki kyndon Aiñ, la bynrap shuh shuh u District Magistrate.
Kane ka hukum kan treikam noh mardor naduh ba la pynmih ia ka.
