U Sordar ka shnong Mawryngkneng u bah Peter J. Lawai u la pynrem jur halor ka jingleh ki Pulit bad ka sorkar jylla da kaba ñiom bor pyrshah ia ki dkhot ka Meghalaya Commercial Truck Owners and Drivers Association (MCTODA) ha ka jingiakhih jong ki ban dawa ia la ka jong ka hok.
Haba kren sha ki nongthoh khubor, u bah Lawai u la ong ba ka shnong ka kyrshan pura ia ka MCTODA halor ka jingdawa jong ki, ba ki Company pynmih Cement ki dei ban siew katkum ka dor ba la buh.
Haba ïadei bad ka jingjia kaba la jia ha ka sngi Balang u Sordar u la kynthoh ïa kito kiba don ha ka bor ba ki knieh noh ïa ka hok jong ki nongbylla sngi bad kiba duk ba suk.
U la maham shuh shuh ba lada ka sorkar ka dang bteng ban pyndonkam da ka bor pyrshah ïa ki nongïakhih ba jai jai, ka shnong kan ym don jingartatien ban ïasoh bad ban ai ka jingkyrshan kaba pura ïa ka MCTODA ha ka jingïakhih jong ki pyrshah ïa ka jinglehbor jong ki mynder, la ong shuh shuh u Sordar.
