Ka ophis u Deputy Commissioner ha ryngkat ka ophis District Sports Officer West Jaiñtia Hills District kila pynkut noh ïa ka ‘District Level Chief Minister Youth Engagement Programme 2025’ ha ka jingïalang bala pynlong mynta ka sngi Palei ha District Library Auditorium, Mynthong Jowai halor ka phang kaba ong ‘Empower Youth Empower Meghalaya’.
Ha kane ka sngi pynkut u Symbud Myntri Rangbah ka sorkar jylla u ma Sniawbhalang Dhar ula long u kongsan, ha ka jingdonlang u Deputy Commissioner ka WJHD u Abhinav Kumar Singh, IAS, u DSO ma K. Passah, ki nongkitkam ka WJDSA, ki nonghikai bad ki khynnah skul.
Ha kane ka prokram ki khynnah skul kiba wan ïa shim bynta ha ki jingïakop bapher bapher ki dei napoh ka Thadlaskeiñ Block, Laskeiñ, Amlarem bad ka Namdong Block kiba don hapoh ka West Jaiñtia Hills District.
Na ka liang u ma Sniawbhalang Dhar haba ai jingkren ula ai khublei ïa baroh ki samla pule kiba la shim bynta ha kane ka ‘District Level Chief Minister Youth Engagement Programme 2025’ ïa kaba ka sorkar kala wanrah khnang na ka bynta ki samla kiba don shisha ïa ka sap bad ka phong ha ki bynta bapher bapher.
Ula kyntu ïa ki samla pule ba kin long kiba minot bad kiba treishitom ha ka jingim khnang ba kin poi sha ka thong jong ka jingjop, ha ka juh ka por u kyntu ba kin wad ki lad ki lynti kumno ban seng ïa ka kam lajong ha ka jingim bad ban long ki trai jong ka kam. Da kaba pynsngew ba ka pyrthei mynta ka don hapdeng ka jingïaleh (competition) ha kiba bun ki bynta jong ka jingim.
Ha kane ka sngi la sam ïa ki khusnam sha ki nongjop da u kongsan ha ka jingïakop Folk Song la jop da ka Kiang Nangbah Govt. College Jowai, ha ka Folk Dance la jop da ka Sohkha Govt. H/S School Sohkha, haka Talent Show la jop da ka Govt. Boys H/S School, haka Tug of war (Boys) la jop da St. Joseph’s S/S, haka Tug of war (Girls) la jop daka Kiang Nangbah Govt. H/S School, ha ka One Act Play la jop biang da ka Govt. Boys H/S School, Jowai.
Ha ka Quiz Competition la jop da u Diplanmi Talang bad u Plieladshaphrang Syngkon na ka Kiang Nangbah Govt. College Jowai. Haka jingïakop thoh Poetry la jop da ka Philawanhun Lamare na ka Winter Adventist H/S School, ha ka Story Writing la jop da ka Safica Tariang na ka Khrist Syiem S/S, ha ka Painting la jop da ka Dahundiam Pohsngap na ka Govt. Boys H/S School, ha ka Declamation la jop da ka Mymhasa Gympad na ka Govt. Boys H/S School (NSS Unit), ha ka Guitar la jop da u Hameiahdaka Langwar na ka Cadenza School of Music, ha ka Science & Innovation la jop da u Ebankitlang Dkhar bad u Sixstar Thubru na ka Little Flower H/S School Ummulong.
