U Symbud Myntri Rangbah ka Jylla u Bah Prestone Tynsong mynta ka sngi ka 7 tarik Naiwieng 2025 haba iakren bad ki lad pathai khubor u la ong ba ka sorkar jylla ka la kyrpad ia ka Meghalaya Commercial Truck Owners & Driver Association (MCTODA), ban sangeh noh ia ka jingiakhih bad ban wan sha ka miej jingiakren.
U la pyntip ba u Symbud Myntri Rangbah ba khmih ia ka tnad Transport u ma Sniawbhalang Dhar u la khot ia ka jingialang bad ki nongialam ka Meghalaya Commercial Truck Owners & Driver Association ha Jowai ban ia pynbeit noh ia ka kynrum kynram kaba la mih ha kine ki sngi ha ka thaiñ Mawryngkneng.
U Symbud Myntri Rangbah ba peit ia ka tnad Pohïing u la kyntu ia ka Meghalaya Commercial Truck Owners & Driver Association (MCTODA) ban weng noh ia ka jingiakhih bad mynta ka dang ap ia ka rai jong ki ban don ka jingiakren sngewthuh jingmut.
Halor ka jingdawa ban pyllait ia kiba shahkem u Bah Prestone u la ong, ka aiñ kan leh ia ka kamram bad u kyntu ba ki dei ban weng shwa ia ka jingiakhih ban nym thut ka leit ka wan jong u Paidbah ha ka thaiñ Mawryngkneng.
