U Symbud Myntri Rangbah ba khmih ia ka tnad Transport u Ma Sniawbhalang Dhar ha ka 7 tarik Naiwieng 2025 u la khot ia ka jingialang bad ki Nongialam ka Meghalaya Commercial Truck Owner & Driver Association (MCTODA) ban iakren halor ka kynrum kynram ba la mih ha kine ki sngi hadien ka jingmih iakhih ka Meghalaya Commercial Truck Owners & Driver Association ban dawa pynkiew ia ka dor bai kali.
Shuh shuh u la ong ki nongialam ka MCTODA ki la ong ban pyllait noh ia ki nongialam kiba la shah kem ha ka jingiakhih kaba la jia ha Mawryngkneng, bad na ka liang u Ma Sniawbhalang u la kyntu ia ka MCTODA ban sangeh noh ia ka jingiakhih khnang ba ka sorkar kan leh ia kaba donkam ban pyllait noh ia ki bad na ka liang ki nongialam ka MCTODA ki la pan por bad kin sa shim ia ka rai halor ka jingiakhih jong ki.
Haba iadei bad ka dor ba la buh da ka sorkar u Ma Sniawbhalang Dhar u la iathuh ba ki hap ban pyntreikam katkum ka dor ba la bthah da ka sorkar.
Halor ka jingdawa ka MCTODA ban ailad shwa ia ki trai jylla, haba iadei bad ka jingkit ia ki Cement , na ka liang u Ma Sniawbhalang Dhar u la pyntip ba ka sorkar ka kyntu ia ki Company Cement ba ki trai jylla ki dei ban ioh shwa nakhmat haba iadei bad ka jingkit ia ki Cement.
Hadien ba la kut ka jingiakhih, ka Sorkar kan sa khot biang ia ka jingialang bad ki company Cement, ki nongialam ka MCTODA ban iakren bad kin sa shim ia ka rai kaba biang ia baroh la ong shuh shuh u ma Sniawbhalang Dhar.
