Mynta ka sngi ka Meghalaya Bharat Scouts and Guides kala ioh ban rakhe ia ka jingdap 75 snem ka jingseng nongrim ia ka (Diamond Jubilee) bad pyllong ruh ia ka Rajya Puraskar Rally ha phyllaw jong ka Raj Bhavan, Shillong.
Ha kane ka sngi u Lat ka jylla u C.H. Vijayashankar kum u kongsan ula sam ia ka Rajya Puraskar (Governor’s Award) Certificate, kaba dei kawei na ki khusnam ba halor duh jong ki Scouts and Guides hapoh ka jylla.
Ha kane ka jingsam khusnam kila don haduh 305 ngut kiba la ioh, kiba kynthup 80 ki Scouts bad 225 ngut ki Guides, kiba dei na ki skul bapher bapher hapoh ka jylla. Ki don ruh 2 ngut ki Guides na Ri Bhoi District kiba la ioh ia ka khusnam Rashtrapati (President’s Award) Certificate ruh kila don lang hapoh kane ka thup.
Haba ai jingkren ha kane ka jingialang u Lat ula iaroh shi katdei eh ia ka jingtreishitom bad ki kam jong ki Scouts bad Guides kiba la kit la bah na ka bynta ka jingbha jingmiat jong ka ri bad ka pyrthei hi baroh kawei. U la pynpaw ba ka long kaba donkam ruh ban pynneh pynsah ia ka jinglong jyrngam jong ka pyrthei da kaba kyntu ia baroh ban thung ia ki dieng khnang ban pynneh pynsah ia ka mei mariang.
U Lat ula pynpaw ka jingsngewkmen ban ioh iadon bynta bad ki Scouts bad Guides ha kane ka jingrakhe dap 75 snem jong ki, bad u ong ba na ka liang jong ka Raj Bhavan kan iai bteng ban kyntiew shaphrang ia ki kam jong ki Scouts bad Guides hapoh ka jylla.
