Ka Meghalaya Pradesh Congress Committee (MPCC) mynta ka sngi ka 12 tarik u Naiwieng 2025 haba iakren bad ki lad pathai khubor ka la pynpaw ba ka iasnohkti lang bad ka AICC ban pyrshah ia ka jingwan ka bor synshar kaba khlem kohnguh ia ka rukom synshar Paidbah.
Haba kren sha ki lad pathai khubor ka Working President ka Deborah C Marak ka la ong ba Congress ha ka jylla ka la pynlong ia ka signature campaign ha manla ki block bad haduh mynta kumba 10,000 ngut ki paidbah ki la soi ban pynpaw ïa ka jingpyrshah jong ki halor ka jingtuh Vote.
Ki nongïalam Congress ki ong ba kane ka jingpyrshah kam dei ban shim khia tang kum ka kam party, hynrei ka dei ban long ka jingpyrshah paidbah pyrshah ïa ka jingthmu ban pynkhein ïa ka rukom synshar paidbah ha ka ri. Ki ong ruh ba ki nong Meghalaya ki dei ban long kiba husiar bad ym dei ban shah pynbiej, namar ka hok ban jied bad ban pynkylla ïa ka sorkar ka dei ka bor jong u paidbah.
Ha kaba ïadei bad ka jingthep kyrteng ki nongthep vote, ka party ka la ïakynduh ïa u Chief Electoral Officer (CEO) ban ai jingmut ba dei ban ai bor shuh shuh ïa ki Dorbar shnong namar ka jylla kam don Panchayati Raj. Kane ka jingai bor kan ïarap ban khang ïa ki nongthep vote ki bym dei ki nong Meghalaya ne kiba pyndonkam bakla ïa ka electoral roll.
