U Bah Lahkmen Rymbui Myntri ba khmih ia ka Tnad Pule Puthi ka Jylla, u la iathuh ba hadien ka jingialang jong ka ‘State Higher Education Council’ la ioh ban iakren shibun ki mat na ka bynta ban kyntiew ia ka Pule puthi ha ka Jylla, kynthup ia ka jingshim rai jong ki khynnah ban pep skul noh shiteng por.
Na ka liang u Bah Rymbui, u la ai ka jingiaroh ia u Myntri Rangbah ka Jylla Conrad Sangma, uba la shimkhia bad phai khmat bha na ka bynta ban kyntiew ia ka jingnang jingstad ha ka Jylla. “Naduh ba shimti ka MDA-1 ka Sorkar ka la shimkhia na ka bynta ban iakhun ia ka jingpep skul ba shiteng por jong ki samla pule ha ka Jylla.
Ngi hap ban khmih kaei ka daw ba kiew ka jingpep skul ki khynnah, lehse ka dei na ka daw ba duna ka ioh ka kot”.
U Myntri u la iathuh ba ka Sorkar ka kwah ban ai ka lad ka kabu ia baroh ha kaba la kyntiew ruh ia ka Scholarship ha ki thup bapher bapher, kata katkum ka kyrdan bad Tnad Pule na ka bynta ban iarap ia ki khynnah.
Ban kyntiew ia ka pule puthi donkam ruh ban ai mynsiem bad pyrkhat ia ki Nonghikai kiba dei u budlum jong ki khynnah pule, kumta ban kiew ia ka Pule puthi, u Bah Lahkmen u la pyntikna ba ha u snem ban wan, ka Sorkar kan sa pynkiew ia ka tulop ki Nonghikai Skul ha ka Jylla.
