U Symbud Myntri Rangbah Bah Prestone Tynsong mynta ka sngi ka 12 tarik Naiwieng 2025 u la pyniaid ia ka jingialang ha ka jingdon ryngkat lang u Symbud Myntri Rangbah ba khmih ia ka tnad Transport u Ma Sniawbhalang Dhar, ki Ophisar ka tnad Transport, DC East Jaintia Hills bad West Jaintia Hills, ki Nongialam ka MCTODA bad ki nongmihkhmat jong ki kompeni cement ban pynbeit ia ki jingeh ba la slem bha halor ka dor kit jingkit.
Ha kane ka jingïalang la wan ban ïashim bynta da ki nongmihkhmat na ki 8 tylli ki kompeni cement.
Haba kren sha ki lad pathai khubor u Symbud Myntri Rangbah ba khmih ia ka tnad Transport u ma Sniawbhalang Dhar, u la pyntip ba ka sorkar ka la rai ban pyntreikam ïa ka dor baikit cement kaba long Rs.9/- tyngka shi ton shi kilomitar hapoh ka jylla Meghalaya.
Ka dor ba la buh Rs.9/- tyngka kan treikam na ka bynta baroh ki lynti iaid hapoh ka jylla, bad yn sa pynmih shen ia ka jingpynbna”, la ong u ma Dhar.
Ha kane ka jingialang la iakren ruh halor ka jingdawa jong ka MCTODA ban pynkiew ia ka bhah jong ki trok ba la ai sha ki local transporter ban kit cement. Mynta ia ki trok trai ri la ai ia ka bhah kaba long 100 tylli ha ka shisngi, katba ka seng MCTODA ka la dawa ban pynkiew sha ka 120 trok ha ka shisngi, bad na ka liang ki kompeni Cement ki la pan por shi taiew ban pynbeit bad ki kompeni Cement halor ka jingdawa ka MCTODA 120 tylli ki trok ha ka shi sngi.
Khatduh u Ma Sniawbhalang Dhar u la pyntip ba kan sa don biang ka jingialang ha ka 21 tarik Naiwieng 2025 na ka bynta ban iakren sani bha halor kiwei de ki jingdawa ka MCTODA.
