Ha ka sngi sdang jong ka Tamasa Cherry Blossom ia kaba la pynlong ha Madan Polo, Shillong la sakhi ia ka jingshlei ki paidbah ban wan sakhi da la ki khmat ia ka Tamasa kaba heh ha ka Jylla ha kaba la wan ban pynbyrngia ruh da ki nongrwai bad ki nongshad ba paw ha ka pyrthei kynthup ia ka Kynhun ‘Scrip, Nora Fatehi, Jason Derulo, Tyga, Agua bad kiwei kiwei ki nongrwai ba paw kynthup ruh katto katne ki nongrwai na kane ka Jylla.
Ha kane ka sngi, la sakhi nyngkong ia ka jingdheng kali naduh shiteng sngi ha kaba ki paidbah ki la iabeh ban poi sha katei ka jaka na ka bynta ban ioh ia ki Ticket/Wristband ban ioh ruh sha ka rynsan ba la pynkhreh. Ka jingdheng kali ka jur bha ha ka thain Police Bazar, Umsohsun, Motphran, Iew Polo. Watla ka tnad Pulit ka la pyrkhing bun tylli ki jaka ban ym shah rung na ka bynta ban pynduna ia ka jingdheng hynrei namar ka jingbun palat u paidbah, ka jingsahkut ka la long da ki kynta. La sakhi ruh ba ka jingwan jong ki paidbah kam long tang na kane ka jylla, hynrei na kiwei ki Jylla ha India bad khambun na ka Thain Shatei Lam Mihngi (North East India).
Ka jingpynkhreh ka la long kaba itynnad bad kaba i shongkhia ha kaba la pynsuk ruh ia u paidbah naduh ka jaka ieng kali, ki jaka bam, ki jaka ialehkai bad kiwei ki jingpynbyrngia.
Kaba la ai mynsiem ia ki nongrwai bad ki paidbah ha kane ka sngi ka long, ba u Myntri Rangbah ka Jylla Conrad K. Sangma, Bah Prestone Tyngsong, Bah Sniawbhalang Dhar ki la wan ban sakhi ia kane ka Tamasa.
