Mynta ka sngi u Myntri Rangbah ka jylla u Conrad K Sangma u la plie ia ka jaka ai jinghikai bad ka prokram ban nang ia ka ktien Japan ba la pynlong da ka Meghalaya State Skill Development Society (MSSDS), ka tnad jong ka Labour, Employment & Skill Development jong ka sorkar Meghalaya ha Mount View Building, Barik Shillong.
Ha kane ka prokram la don lang ruh u Myntri ka tnat Labour u Methodius Dkhar bad u Nishikwa Toshiaki San uba dei u Chairman bad CEO ka Asean Group Co Ltd nalor ki nonghikai bad ki ophisar na ka MSSDS.
U Myntri Rangbah haba kren ha kane ka jingplie paidbah, u la ong ba ka Meghalaya ka ïatrei jan bha bad ka ri Japan ha ki bynta bapher bapher. “Ka rukom pyrkhat jong ngi ka long kaba shai bha bad kaba pynleit jingmut bha ngim kwah ban don ka jingïadei kaba bun bad ki jaitbynriew kiba bun namar lada phi pyrshang ban ïadei bad baroh phin ym don ka jingïadei badno badno ruh,” u la ong bad bynrap ba ka Japan bad ki jylla jong ka thaiñ shatei lammihngi ki don ïa ka jingïadei ha ka liang ka bam bad ka kolshor bad ka Japan ka la ïatreilang bad ka India la bun snem mynta.
Haba pyrkhat ia ka jingiaid lynti jong ka jingiatreilang bad ka Japan u Myntri Rangbah ka jylla u la ong ba ar snem mynshwa la phah tang arngut ki nurse sha Japan bad haduh mynta ki don haduh 37 ngut ki nurse kiba trei ha Japan bad la khmih lynti ba kin dang wan rung shuh shuh ha ki bnai ban wan. “Ki nurse jong ngi kiba trei ha Japan mynta ka sngi ki don ha ka kyrdan N4 bad ngi kitbok kitrwiang ba ki nurse jong ngi kin long ki nurse N3 Grade na ka bynta ka tulop kaba kham heh. Ki nurse jong ngi la kumno kumno ki phah pisa kumba 1 lak tyngka sha la ki bahaiing bad ka pisa bar ri kaba wan sha ka jylla jong ngi lyngba kine ki 37 ngut ki nurse ka long kumba 5 klur man la u snem”, u la ong.
U Myntri Rangbah ka jylla u la ong ba ka sorkar ka kwah ban ailad ïa ki samla ka jylla ban leit sha Japan ym tang ban kamai jakpoh hynrei ban ïoh ruh ïa ka jingshemphang bad ong, “Hangne ka wan ka jingïatreilang hapdeng ka kynhun ASEAN bad ka sorkar Meghalaya ha ka dur bad ngi kum ka sorkar ngi pynsuk ïa kane ka kam baroh kawei.” U la pyntip ruh ba ki 37 ngut ki Nurse kiba don ha Japan ki la hap ban leit shah hikai ha Bangalore na ka bynta hynriew bnai. “Phi long kiba donbok namar phin shah hikai hi hangne ha Shillong”, u la ong.
Haba pdiang sngewbha ia ki arngut ki nonghikai na Japan u Myntri Rangbah u la ong ba watla kin don ki jingeh hynrei ka sorkar bad ki paidbah ka jylla Meghalaya kin leh katba lah ban pynthikna ia ka jingsuk jong ki ha kane ka jylla.
Ha kaba pynkut u Myntri Rangbah u la kyntu ia ki samla pule ba kin pyndonkam hok ia ka kabu ban kyntiew ia ka jingtbit bad ka lad ban ioh kam. 86 ngut ki samla pule kiba la pynrung kyrteng na ka bynta kane ka prokram ai jinghikai ïa ka ktien Japan kaba 6 bnai.
