-Kawei na ki kadei na Rilum Jaintia, duh jingkyrmen ki bahaïing na ka jingmynsaw jur-
Katkum ka jingiathuh jong u Bah Vivek Syiem, SP East Khasi Hills District hynne ka sngi ka 18 Naiwieng 2025, katei ka jingshah tynrah ka la jia hynnin ka sngi (17.11.25) ha ka por kumba 7:50 janmiet. U SP u la ai ruh ia ka jingpyntikna ba u nongñiah uba la tynrah ia katto katne ki samla pule ha NEHU, kynthup ia 2 ngut kiba la mynsur jur, u dei uba la dih kyiad.
Katkum ka jingiohi na ka kor CCTV, la sakhi ba utei u nongniah u la tynrah ia kiba bun kynthup ia ka scooty kaba dang iaid lynti. Ki ar ngut kiba la mynsaw jur na ka jingshah tynrah ha u Parmen M. Sangma ki kynthup ia ka Samla Stephanie Shadap 22 snem bad ka Samla Daritngen Ponpukhei 20 snem ka rta. Ka kali kaba la tynrah ia ki ka don ia u Registration No – ML05 J 4916. U Sangma u dei u ba trei Security Card ha NEIGRIHMS bad u sah ha katei ka Skulbah.
Shuh shuh u la iathuh, ba ia utei u runar la kem bad mynta u dang hap ha ka jingtohkit ha kaba la pynngat ruh ha ka kyndon 109 jong ka BNS kaba dei ka aiñ ‘ka jingthmu ban pyniap’.
Katkum ka kaiphod, la iathuh ba ki 2ngut kiba la mynsaw jur bha ki la don mynta ha ICU, Nazareth Hospital. La ioh ruh ia ka jingtip ba kawei na ki kadei ka samla (Daritngen) kaba na ka Shnong Borghat East Jaintia Hills kaba dang pule Master of Science 1st Year ha ka Department of Chemistry jong ka Skulbah NEHU.
Na ka liang ki bahaiing jong ka Samla Daritngen ki la iathuh ba ka khun jong ki kam pat tip briew haduh mynta bad la iohi ruh ia ka jingmynsaw kaba jur na ka bynta jong ka khlieh. Katkum ka jingioh ban sakhi jong ki ia la ka khun, la iathuh ba ka jingmynsaw ka la long kaba ym lah shuh ban pyrkhat kumba la khmih lynti bad namar ka jingbym pat tip briew, na ka liang ki bahaiing ki la pynpaw ia ka jingdiaw bad jingduh jingkyrmen.
